Երեւանի «Կոնգրես» հյուրանոցում մեկնարկել է Հայաստանի ավանդական ուշուի ֆեդերացիայի ընդհանուր ժողովը, որի օրակարգում ֆեդերացիայի նոր նախագահի ընտրությունն է, փոխանցում է NEWS.am Sport-ի թղթակիցը:
Ֆեդերացիայի նախագահը մինչ այս Տիգրան Չոբանյանն էր: Նախագահի ընտրությունն անցկացվում է մեկ թեկնածուով՝ Ռուստամ Ալավերդյան:
Ժողովի մեկնարկից րոպեներ առաջ նիստերի դահլիճ մտավ Տիգրան Չոբանյանը եւ փորձեց խոչընդոտել անցկացվելիք ժողովը, նոր նախագահի ընտրությունը:
Տիգրան Չոբանյանը ֆեդերացիայի գործկոմի կողմից ստացել է մասնակցության հրավեր, ծանուցվել է տեղի ունեցող ժողովի եւ նախագահի ընտրության մասին, բայց հրաժարվեց գրանցվել եւ մասնակցել ժողովին: Նրան թույլ չտվեցին առանց գրանցվելու նիստերի դահլիճ մուտք գործել:
«Այս ժողովն անօրինական է, անցնում է ֆեդերացիայի կանոնադրության կոպիտ խախտումներով, ես ունեմ իրավական փաստաթուղթը, որ այս ամենն անօրինական է, եւ դուք որեւէ իրավունք չունենք այն անցկացնելու, նախագահ ընտրելու: Եթե այս ժողովը կայանա, ես իմ ձեռքի տակ եղած փաստաթուղթը կհանձնեմ իրավապահ մարմիններին, որպեսզի իրավական հիմքով լուծում ստանա այս հանցագործությունը»,- հայտարարեց Տիգրան Չոբանյանը:
Ֆեդերացիայի գործկոմի անդամները Տիգրան Չոբանյանին դուրս հրավիրեցին:
Ժողովն ընթանում է, մասնակցում է գործկոմի 44 անդամներից 27-ը: Քանի որ մասնակիցների քանակը ապահովում է ձայների 50 տոկոսից ավելին, քվորումը համարվեց ապահոված: Նախագահի ընտրությունն մասնակիցների ձայների մեծամասնությամբ ընթանում է փակ քվեարկությամբ:
Լուսինե Շահբազյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։