Հոլանդը նորամուտը հեթ-տրիկով նշած 7-րդ ֆուտբոլիստն է Բունդեսլիգայի պատմության մեջ

Դորտմունդի «Բորուսիայի» նորեկ Էրլինգ Հոլանդը Բունդեսլիգայի պատմության մեջ 7-րդ ֆուտբոլիստն է, որին հաջողվում է Գերմանիայի առաջնությունում նորամուտի խաղում դառնալ հեթ-տրիկի հեղինակ։

Հիշեցնենք, որ Գերմանիայի առաջնության 18-րդ տուրում «Բորուսիան» 5։3 հաշվով կամային հաղթանակ տարավ «Աուգսբուրգի» նկատմամբ։ 19-ամյա նորվեգացի հարձակվողը փոխարինման դուրս եկավ երկրորդ խաղակեսում եւ աչքի ընկավ 59, 70 եւ 79-րդ րոպեներին։

Նախորդ անգամ նորամուտի խաղում երեք գոլ խփել էր գաբոնցի հարձակվող Պյեր-Էմերիկ Օբամեյանգը, որը 2013-ին Դորտմունդի «Բորուսիայի» կազմում առաջին հանդիպումը նույնպես անցկացրել էր «Աուգսբուրգի» դեմ։ Այդ խաղում «Բորուսիան» հաղթել էր 4։0 հաշվով։