«Աթլետիկոն» հաղթեց «Բարսելոնային». Մադրիդյան դերբի՝ եզրափակիչում (տեսանյութ)
00:54 10 հունվարի, 2020Իսպանիայի սուպերգավաթի խաղարկության կիսաեզրափակիչի երկրորդ խաղում չեմպիոն «Բարսելոնան» Սաուդյան Արաբիայում ուժերը չափեց Մադրիդի «Աթլետիկոյի» հետ: Դիեգո Սիմեոնեի գլխավորած թիմը հաղթանակ տարավ 3:2 հաշվով և դուրս եկավ եզրափակիչ:
Խաղի հաշիվը 46-րդ րոպեին բացեց «Աթլետիկոյի» իսպանացի կիսապաշտպան Կոկեն: 51-րդ րոպեին Լուիս Սուարեսի փոխանցումից հետո «Բարսելոնայի» պատասխան գոլը խփեց արգենտինացի հարձակվող Լիոնել Մեսին: 62-րդ րոպեին «Բարսելոնային» հաշվի մեջ առաջ մղեց «Աթլետիկոյի» նախկին հարձակվող, ֆրանսիացի Անտուան Գրիզմանը: 81-րդ րոպեին իսպանացի հարձակվող Ալվարո Մորատան 11 մետրանոցից հավասարեցրեց հաշիվը: 86-րդ րոպեին «Աթլետիկոյի» արգենտինացի հարձակվող Անխել Կորեան խփեց իր թիմի երրորդ գոլն ու հաղթանակ պարգևեց «Աթլետիկոյին»:
«Բարսելոնայի» կազմից 61-րդ րոպեին Լիոնել Մեսին, իսկ 75-րդ րոպեին՝ Ժերար Պիկեն դարձան գոլերի հեղինակ, սակայն հանդիպման գլխավոր մրցավարն, օգտվելով VAR համակարգից, չարձանագրեց գոլերը:
Իսպանիայի սուպերգավաթի խաղարկության եզրափակիչում «Աթլետիկոն» կմրցի «Ռեալի» հետ: Հանդիպումը տեղի կունենա հունվարի 12-ին:
Իսպանիայի սուպերգավաթն առաջին անգամ է անցկացվում նոր ձեւաչափով՝ կիսաեզրափակիչից։ Առաջին անգամ տիտղոսը չեն վիճարկի չեմպիոնն ու գավաթակիրը։ Կիսաեզրափակիչի առաջին դիմակայությունում գավաթակիր «Վալենսիան» 1։3 հաշվով պարտվել էր Մադրիդի «Ռեալին»։
Իսպանիայի սուպերգավաթ, 1/2 եզրափակիչ
«Բարսելոնա» - «Աթլետիկո Մադրիդ»՝ 2:3
Լիոնել Մեսի, 51, Անտուան Գրիզման, 62 - Կոկե, 46, Ալվարո Մորատա, 81 (11մ.), Անխել Կորեա, 86
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.