Արթուր Ալեքսանյան․ Դեռ լիարժեք չեմ մարզվում, շուտով կմիանամ թիմին ու կպատրաստվեմ Խաղերին

14:27   5 դեկտեմբերի, 2019

Վնասվածքս անցել է, բայց դեռ լիարժեք չեմ մարզվում. միայն ֆիզիկական: Շուտով կմիանամ թիմին ու կպատրաստվեմ Օլիմպիական խաղերին: Այս մասին NEWS.am Sport-ի թղթակցի հետ զրույցում ասաց օլիմպիական չեմպիոն, աշխարհի եռակի, Եվրոպայի քառակի եւ Եվրոպական խաղերի չեմպիոն Արթուր Ալեքսանյանը:

Հունահռոմեական ըմբշամարտի Հայաստանի առաջնությանը Ալեքսանյանը չմասնակցեց, քանի որ ազատված էր վնասվածքից հետո վերականգման փուլում:

«Մարզավիճակս նորմալ է, վերականգնվում եմ: Առայժմ լիարժեք չեմ մարզվում, միայն ֆիզիկական վարժություններ եմ կատարում: Ըմբշամարտ չեմ անում: Դեկտեմբերի 11-ից կմիանամ թիմին եւ կմասնակցեմ Ծաղկաձորի հավաքին: Հունվարին միջազգային մրցաշար ունենք Ֆրանսիայում: Եթե ամեն ինչ լավ լինի, վնասվածքս չխանգարի, փետրվարին կմասնակցեմ Եվրոպայի առաջնությանը եւ դրանից հետո կպատրաստվեմ Օլիմպիական խաղերին: Խոստումներ տալ չեմ սիրում, բայց ամեն հնարավորը կանեմ, որ Տոկիոյում դառնամ կրկնակի օլիմպիական չեմպիոն»,- ասաց Արթուր Ալեքսանյանը:

Նա Հայաստանի առաջնության երկու օրերի ն էլ մարզադահլիճում էր, հետեւում էր գոտեմարտերին, աջակցում ընկերներին: Օլիմպիական չեմպիոնը պարգեւատրեց 87 կգ քաշայիններին․ չեմպիոնի կոչումը նվաճեց աշխարհի եւ Եվրոպայի չեմպիոն Մաքսիմ Մանուկյանը:

Հիշեցնենք, որ Արթուր Ալեքսանյանն արդեն ապահովել է օլիմպիական ուղեգիրը: Վնասվածքը ստացել էր Ղազախստանի մայրաքաղաք Նուրսուլթանում անցկացված աշխարհի առաջնությունում, որտեղ 5 փայլուն հաղթանակ տանելուց հետո հրաժարվեց եզրափակիչ գոտեմարտից: Վնասվածքը թույլ չտվեց հայ ըմբիշին ավարտին հասցնել պայքարը ԱԱ-ում. բավարարվեց արծաթե մեդալով ու օլիմպիական ուղեգրով:

Լուսինե Շահբազյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.