Աշխարհի Գավաթ․ Հայ մարմնամարզիկների արդյունքները
23:37 23 նոյեմբերի, 2019Գերմանիայի Կոտբուս քաղաքում ավարտվող սպորտային մարմնամարզության աշխարհի գավաթի խաղարկության փուլում Հայաստանի ներկայացուցիչ Արթուր Ավետիսյանը բրոնզե մեդալ է նվաճել օղակների վարժությունում: Նա վաստակել է 14,833 միավոր՝ առաջ թողնելով չինացի եւ հույն մրցակիցներին: Ավետիսյանը օղակների վարժության եզրափակիչ էր դուրս եկել 4-րդ տեղով (14,666):
Սա Հայաստանի միակ մեդալն է աշխարհի գավաթի խաղարկությունում: Օղակների վարժությունում Հայաստանի մյուս ներկայացուցիչ, 2019 թվականի Եվրոպայի բրոնզե մեդալակիր Վահագն Դավթյանը 14,825 միավորով 5-րդն է:
Եվրոպայի նախկին չեմպիոն, աշխարհի բրոնզե մեդալակիր Հարություն Մերդինյանը նժույգի վարժության եզրափակիչում 4-րդ տեղն է զբաղեցրել 14,733 միավորով: Հարություն Մերդինյանը եզրափակիչ էր դուրս եկել 7-րդ տեղի արդյունքով(14,266): Հայաստանի հավաքականի կազմում մասնակցել է նաեւ Եվրոպական երկրորդ խաղերի չեմպիոն Արթուր Դավթյանը, որը անհաջող է հանդես եկել: Դավթյանին չի հաջողվել հաղթահարել հենացատկի, պտտաձողի, նժույգի եւ ազատ վարժության որակավորման փուլերը: Հենացատկում՝ 13.100 միավորով գրավել է 20-րդ տեղը, պտտաձողի վարժությունում՝ 13-րդը (13.733 միավոր), նժույգի վարժությունում 25-րդը, իսկ ազատ վարժությունում 29-րդը:
Աշխարհի գավաթի խաղարկությունը վարկանիշային է Տոկիո-2020 Օլիմպիական խաղերի համար: Հայ մարմնամարզիկներից անվանական օլիմպիական ուղեգիր ունի միայն Արթուր Դավթյանը, որը Տոկիո-2020-ում հանդես կգա հենացատկի վարժությունում:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.