Հնդկաստանի Կալկաթա քաղաքում անցկացվող արագ եւ կայծակնային խաղի Tata Steel Chess India Rapid & Blitz մրցաշարում ավարտվեց առաջին մրցումային օրը։
Հայկական շախմատի առաջատար Լեւոն Արոնյանը արագ խաղի երրորդ տուրում սպիտակներով մրցեց աշխարհի չեմպիոն, նորվեգացի Մագնուս Կարլսեին եւ 68-րդ քայլում ընդունեց պարտությունը։
Առաջին երկու տուրերում Լեւոն Արոնյանը ոչ ոքի էր խաղացել ամերիկացի Հիկարու Նակամուրայի եւ հոլանդացի Անիշ Գիրիի հետ։
Արոնյանը 6 հնարավորից վաստակել է 2 միավոր (հաղթանակի համար տրվում է 2, ոչ ոքիի համար՝ 1 միավոր) եւ հետնապահների թվում է։ Առաջատարը Կարլսենն է՝ 5 միավոր։
Նոյեմբերի 23-ին անցկացվելիք 4-6-րդ տուրերում Արոնյանի մրցակիցները կլինեն հնդիկներ Վիշվանաթան Անանդն ու Պենտալա Հարիկրիշնան եւ չինացի Դին Լիրենը։
Tata Steel Chess India-ն Grand Chess Tour-ի նախավերջին փուլն է։
Հիշեցնենք, որ Լեւոն Արոնյանի հաղթանակով ավարտվեց Grand Chess Tour-ի Superbet Rapid & Blitz մրցաշարը Ռումինիայի մայրաքաղաք Բուխարեստում։
Grand Chess Tour-ի ընդհանուր հաշվարկում Լեւոն Արոնյանը կիսում է չորրորդ տեղը ռուսաստանցի Սերգեյ Կարյակինի հետ։
Grand Chess Tour-ի եզրափակիչը կմեկնարկի դեկտեմբերի 2-ին Լոնդոնում։
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։