Թաիլանդում անցկացվող ծանրամարտի աշխարհի առաջնությունում սեպտեմբերի 25-ին 102 կգ քաշային կարգում պայքարի մեջ մտավ Եվրոպայի փոխչեմպիոն Սամվել Գասպարյանը: Հրում վարժության ընթացքում ստացած վնասվածքը խանգարեց Սամվել Գասպարյանին պայքար մղել չեմպիոնության համար:
Պոկում վարժությունում Սամվել Գասպարյանը 10 կգ-ով գերազանցեց Եվրոպայի առաջնությունում գրանցած արդյունքը և, բարձրացնելով 178 կգ, նվաճեց փոքր բրոնզե մեդալ:
Հրում վարժությունում Գասպարյանն առաջին մոտեցմամբ բարձրացրեց 212 կգ, սակայն երկրորդ մոտեցման ժամանակ ստացավ մկանային վնասվածք և չկարողացավ գլխավերևում պահել 216 կգ-ն: Գասպարյանը, չնայած վնասվածքին, երրորդ մոտեցմամբ ևս փորձեց բարձրացնել 216 կգ, սակայն ձախողվեց:
Երկամարտի 390 կգ արդյունքով Սամվել Գասպարյանը 5-րդ տեղում է:
Կարող ենք արձանագրել, որ 6 ամսվա ընթացքում Սամվել Գասպարյանը պոկում վարժությունում առաջընթաց է գրանցել 10, իսկ հրում վարժությունում՝ 3 կգ-ով:
Աշխարհի չեմպիոն հռչակվեց Բելառուսը ներկայացնող Եվգենի Տիխանչովը՝ երկամարտի 398 կգ արդյունքով: Արծաթե մեդալ նվաճեց Հարավային Կորեան ներկայացնող Ջին Յունսոնգը՝ 397 կգ արդյունքով: 394 կգ արդյունքով բրոնզե մեդալակիր դարձավ իրանցի Ռեժա Դեհդարը:
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։