Ֆալկաոն հետաքրքրված է Իսպանիա վերադարձով

Ֆրանսիայի առաջնությունը ներկայացնող «Մոնակոյի» և Կոլումբիայի ազգային հավաքականի հարձակվող Ռադամել Ֆալկաոն կարող է մարզական կարիերան շարունակել իսպանական «Վալենսիայում», հայտնում է AS-ը։

Ֆալկաոն ցանկանում է հեռանալ «Մոնակոյից» և այժմ բանակցում է «Վալենսիայի» ղեկավարության հետ։ «Վալենսիայում» Ֆալկաոն կփոխարինի Ռոդրիգոյին։ Ավելի վաղ Ֆալկաոյի տեղափոխությամբ հետաքրքրված էր թուրքական «Գալաթասարայը», սակայն կողմերին չհաջողվեց վերջնական համաձայնություն ձեռք բերել։

Ֆրանսիայի առաջնության նախորդ մրցաշրջանում Ֆալկաոն մասնակցել է 33 հանդիպման և դարձել 15 գոլի հեղինակ։

2011-2013 թվականներին Ֆալկաոն հանդես է եկել Մադրիդի «Աթլետիկոյում»: