Էմերի. Իվոբին կարևոր ֆուտբոլիստ էր «Արսենալի» համար

Լոնդոնի «Արսենալի» գլխավոր մարզիչ Ունաի Էմերին մեկնաբանել է թիմի 23-ամյա կիսապաշտպան Ալեքս Իվոբիի տեղափոխությունը «Էվերթոն»: Նիգերիացի կիսապաշտպանը «Էվերթոնի» հետ կնքել է 5 տարվա պայմանագիր:

«Ալեքսը շատ բան է տվել «Արսենալին»: Նա մեծ աշխատանք է կատարել ակումբի ակադեմիայում, որտեղ շատ երիտասարդ ֆուտբոլիստների համար դարձել էր օրինակ: Իվոբին շատ կարևոր ֆուտբոլիստ էր մեզ համար: Մենք լավագույնն ենք ցանկանում նրան իր կարիերայում»,- Էմերիի խոսքը փոխանցում է «Արսենալի» մամուլի ծառայությունը:

Իվոբին «Արսենալի» ակադեմիայի սան է, իսկ գլխավոր թիմում նորամուտը նշել էր 2015թ․ հոկտեմբերին, 19 տարեկանում։

Ոչ պաշտոնական տվյալներով, տրանսֆերի արժեքը 40 միլիոն ֆունտ ստերլինգ է։