Նիկոլ Փաշինյանը Համահայկական խաղերը հայտարարեց բացված

Հայաստանի վարչապետ Նիկոլ Փաշինյանը Ստեփանակերտում բացված հայտարարեց Համահայկական ամառային 7-րդ խաղերը։

Նախքան այդ ջահը բոցավառել էին Արցախի թեմի առաջնորդ Պարգեւ Սրբազանը, հրաձգության օլիմպիական չեմպիոն Հրաչյա Պետիկյանը եւ Համահայկական խաղերի համաշխարհային գործկոմի փոխնախագահ, ամերիկահայ բարերար, Խաղերի հիմնադիրներից Ալբերտ Բոյաջյանը։

Խաղերի ծրագրում ընդգրկված է 17 մարզաձեւ: Խաղարկվելու է 105 մեդալային հավաքածու: Մասնակցելու է շուրջ 5000 մարզիկ 145 քաղաքից։ Համահայկական խաղերը սպասարկելու է 406 մրցավար՝ Հայաստանից, Արցախից, Ռուսաստանից, Իրանից, Վրաստանից եւ Ղազախստանից: Գլխավոր մրցավարը սպորտի վաստակավոր գործիչ, օլիմպիական մրցավար Դերենիկ Գաբրիելյանն է: 

Խաղերի փակումը տեղի կունենա օգոստոսի 17-ին Երեւանում։ Խաղերի գլխավոր հովանավորը «Տաշիր Գրուպն» է։