Արթուր Դավթյանը՝ Մինսկից․ Սպասում էի, որ մրցանակակիր կլինեմ, բայց որ չեմպիոն կդառնամ՝ չէի սպասում
09:14 1 հուլիսի, 2019Շատ ուրախ եմ ոսկե մեդալ նվաճելուս համար։ Այս անգամ բախտն ինձ ժպտաց, բայց իրականում այդքան էլ չէի սպասում, որ կնվաճեմ չեմպիոնի տիտղոսի կոչումը։ Այս մասին NEWS.am Sport–ի թղթակցի հետ զրույցում Մինսկից ասաց Եվրոպական խաղերի նորընծա չեմպիոն, սպորտային մարմնամարզության Հայաստանի հավաքականի առաջատար Արթուր Դավթյանը։
Հենացատկի վարժությունում Արթուր Դավթյանը 15.016 միավորով հռչակվեց Եվրոպական խաղերի չեմպիոն։
«Մեդալի ակնկալիք ունեի։ Սպասում էի, որ մրցանակակիր կլինեմ, բայց որ չեմպիոն կդառնամ, չէի սպասում։ Մինսկ գալուց առաջ նպատակս անպայման մեդալ նվաճելն էր։ Մտածում էի, որ գոնե մեդալով պետք է վերադառնամ։ Ցատկերս շատ լավ արեցի։ Կյանքում այսպես չէի կատարել, շատ լավ ստացվեց։ Այսօր իմ օրն էր։ Բոլորին շնորհակալ եմ, ով երկրպագում էր ինձ»,- ասաց Արթուր Դավթյանը։
Արթուր Դավթյանը Եվրոպական խաղերում դուրս էր եկել բազմամարտի, ազատ վարժությունների եզրափակիչ։ Ազատ վարժությունում Դավթյանը 6-րդն էր, բազմամարտում՝ 5-րդը։
Եվրոպական խաղերի վերջին օրը սպորտային մարմնամարզության օղակների վարժությունում արծաթե մեդալակիր է դարձել Վահագն Դավթյանը։
Ոսկե մեդալներ են նվաճել բռնցքամարտի Հայաստանի հավաքականի անդամներ Արթուր Հովհաննիսյանն ու Հովհաննես Բաչկովը, հունահռոմեական ոճի ըմբիշ Արթուր Ալեքսանյանը։ Մինսկում չեմպիոն էր դարձել նաեւ սամբիստ Տիգրան Կիրակոսյանը, որը եզրափակիչում 4։0 հաշվով հաղթել էր ադրբեջանցի Աղասիֆ Սամադովին։
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.