ԵԽ-2019. Գարիկ Բարսեղյանն ու Անդրանիկ Գալստյանը չստացան բրոնզե մեդալի համար պայքարելու հնարավորություն

22:36   25 հունիսի, 2019

Բելառուսի մայրաքաղաք Մինսկում շարունակվող Եվրոպական խաղերի ազատ ոճի ըմբշամարտի մրցաշարում Հայաստանի երկու ներկայացուցիչներ Գարիկ Բարսեղյանն ու Անդրանիկ Գալստյանը չստացան բրոնզե մեդալի համար սփոփիչ գոտեմարտերի հնարավորություն եւ լքեցին պայքարը:

Գարիկ Բարսեղյանին քառորդ եզրափակիչում հաղթած ռուս Զաուր Ուգուեւը կիսաեզրափակիչում 2:3 հաշվով պարտվեց ադրբեջանցի Մահիր Ամիրասլանովին: 125 կգ քաշային Անդրանիկ Գալստյանին հաղթած ուկրաինացի Օլեքսանդր Խոցյանիվսկին եւս դուրս չեկավ եզրափակիչ: Կիսազերափակիչում ուկրաինացի ըմբիշը 1:7 հաշվով պարտվեց Ռուսաստանի ներկայացուցիչ Անզոր Խիժրիեւին:

Հիշեցնենք, որ Գարիկ Բարսեղյանը պայքարը սկսել էր 1/8 եզրափակիչից, որտեղ 3:1 հաշվով հաղթել էր ռումինացի Անդրեյ Դուկովին: Քառորդ եզրափակիչում Բարսեղյանը 0:10 հաշվով պարտվել էր ռուս Զաուր Ուգուեւին:

125 կգ քաշային Անդրանիկ Գալստյանն էլ 1/8 եզրափակիչում 6:4 հաշվով հաղթել էր ավստրիացի Յոհանես Լուդեշերին, իսկ քառորդ եզրափակիչում 0:10 հաշվով պարտվել ուկրաինացի Օլեքսանդր Խոցյանիվսկիին:

Հաբեթնակ Կուրղինյանի գլխավորած թիմի կազմում Եվրոպական խաղերում հանդես կգան նաեւ 65 կգ քաշային Վալոդյա Ֆրանգուլյանն ու 97 կգ քաշային Սարգիս Հովսեփյանը: Նրանք մրցագորգ դուրս կգան հունիսի 26-ին:

Վալոդյա Ֆրանգուլյանը պայքարը կսկսի 1/8 եզրափակիչից: 2017 թվականի Եվրոպայի բրոնզե մեդալակիր, Եվրոպայի մինչեւ 23 տարեկանների չեմպիոն Ֆրանգուլյանի մրցակիցը Ռիո-2016 Օլիմպիական խաղերի բրոնզե մեդալակիր, աշխարհի եւ Եվրոպայի եռակի չեմպիոն, ադրբեջանցի Հաջի Ալիեւն է:

Ֆրանգուլյան-Ալիեւ գոտեմարտը տեղի կունենա Երեւանի ժամանակով 12:40-ին: 97 կգ քաշային Սարգիս Հովսեփյանը նույնպես պայքարը կսկսի 1/8 եզրափակիչից, որտեղ կհանդիպի աշխարհի եւ Եվրոպայի բրոնզե մեդալակիր, առաջին Եվրոպական խաղերի փոխչեմպիոն, վրացի Էլիզբար Օդիկաձեին: Գոտեմարտը կմեկնարկի Երեւանի ժամանակով 13:30-ին:



© 2020 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։