Ֆուտբոլիստները նստացույց են արել խաղի ժամանակ՝ մրցավարի գործողությունների դեմ

Ֆուտբոլի Արգենտինայի երկրորդ դիվիզիոնի ուղեգրի համար պատասխան հանդիպումը «Աթլետիկո Ալվարադո» եւ «Սան Խորխե» թիմերի միջեւ մնացել է անավարտ։

Երկրորդ խաղակեսի սկզբում «Սան Խորխեի» ֆուտբոլիստները նստացույց են արել՝ բողոքելով մրցավարի գործողությունների դեմ։ Առաջին խաղակեսում մրցավարը հեռացրել էր «Սան Խորխեի» երկու ֆուտբոլիստների։ Մի քանի րոպե անց «Սան Խորխեի» ֆուտբոլիստները լքել են խաղադաշտը։

«Աթլետիկոն» առջեւում է եղել 1։0 հաշվով։ Թիմերի առաջին խաղում գրանցվել էր ոչ ոքի՝ 0։0։ Դիմակայության արդյունքի վերաբերյալ որոշում կընդունեն Արգենտինայի ֆուտբոլային իշխանությունները։