Երեւանի «Բանանցի» սեփականատեր Ջեւան Չելոյանցը թիմի գլխավոր մարզիչ Իլշատ Ֆայզուլինի հետ գործող պայմանագիրը երկարաձգելու արարողությունից հետո պատասխանց լրագրողների հարցերին, փոխանցում է NEWS.am Sport-ի թղթակիցը:
«Ֆայզուլինը ցանկանում է աճել ակումբի հետ: Նա լավ մասնագետ է, այդ պատճառով որոշեցինք երկարաձգել պայմանագիրը:
Մենք աստիճանաբար գնում ենք դեպի նոր նպատակներ: Չեմպիոնությունն ինքնանպատակ չէ: Ցանկանում ենք կառուցել նորմալ ակումբ. դա մեր առաջնային նպատակն է: Չեմ ցանկանում նեղացնել ոչ մեկի, սակայն Հայաստանում չկան նորմալ ակումբներ: Միեւնույն ժամանակ, մեր խնդիրը եվրագավաթներում հաջողության հասնելն է:
Հաջորդ մրցաշրջանից ակումբը կանվանափոխվի «Ուրարտու»: Կողմնակալ մարդիկ տեղ չունեն հայկական ֆուտբոլում: Չմասնակցելով Հայաստանի գավաթի խաղարկության կիսաեզրափակիչի պատասխան խաղին, մենք ընդգծեցինք մեր դիրքորոշումը»,- ասել է Ջեւան Չելոյանցը:
Հիշեցնենք, որ Իլշատ Ֆայզուլինի նոր պայմանագիրը «Բանանցի» հետ նախատեսված է մինչեւ 2023-ի ամառ:
Ռուս մասնագետը նախորդ տարվա օգոստոսին էր գլխավորել «Բանանցը»: Դրանից առաջ նա 2017-ի հուլիսից զբաղեցնում էր «Բանանցի» ակադեմիայի գլխավոր տնօրենի պաշտոնը:
Սամվել Սուքիասյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։