#BoycottBaku. «Արսենալի» երկրպագուները սկսել են ստորագրահավաք (ֆոտո)

22:01   23 մայիսի, 2019

Լոնդոնի «Արսենալի» երկրպագուները սկսել են ստորագրահավաք եւ պահանջում են փոխել «Չելսիի» դեմ Բաքվում կայանալիք ֆուտբոլի Եվրոպայի լիգայի եզրափակիչի հանդիպման անցկացման վայրը:

Անգլիացի երկրպագուները նման որոշում են կայացրել Հայաստանի հավաքականի կիսապաշտպան Հենրիխ Մխիթարյանի՝ Եվրոպայի լիգայի եզրափակիչին չմեկնելու որոշման պատճառով:

«Արսենալի» երկրպագուները #BoycottBaku հեշթեգով կոչ են անում բոյկոտել Եվրոպայի լիգայի եզրափակիչն Ադրբեջանի մայրաքաղաքում:

«Չելսիին» ու «Արսենալին» Եվրոպայի լիգայի եզրափակիչը բոյկոտելու խորհուրդ էր տվել նաեւ CNN-ը:

Ավելի վաղ հայտնի էր դարձել, որ «Չելսին» ու «Արսենալը» մտադիր են Եվրոպայի լիգայի եզրափակիչի 6000 տոմս վերադարձնել ՈւԵՖԱ-ին:

ՈւԵՖԱ-ն «Արսենալին» եւ «Չելսիին» տրամադրել էր 5800-ական տոմս, ինչը ստադիոնի տեղերի 10 տոկոսն է: Դրա պատճառը Բաքվի օդանավակայանի տարողունակության խնդիրն է:

Չվերթների սահմանափակ քանակությունը եւ գները, հեռավորությունը, վիզաների հետ կապված խնդիրներն ու հանդիպման անցկացման ուշ ժամը գլխավոր պատճառներն են, որոնք անգլիացի երկրպագուներին ստիպել են հրաժարվել ուղեւորությունից:

Հիշեցնենք, որ ավելի վաղ «Արսենալն» ՈւԵՖԱ-ին քննադատել էր Եվրոպայի լիգայի եզրափակիչն Ադրբեջանի մայրաքաղաք Բաքվում անցկացնելու համար:

«Արսենալի» ու Հայաստանի հավաքականի կիսապաշտպան Հենրիխ Մխիթարյանը չի մեկնելու մայիսի 29-ին կայանալիք եզրափակիչին:

Ավելի վաղ ՈւԵՖԱ-ն եւ Ադրբեջանի իշխանությունը «Արսենալին» եւ Մխիթարյանին տվել էին անվտանգության երաշխիքներ, սակայն լոնդոնյան ակումբը մայիսի 21-ին հայտարարեց, որ հայ կիսապաշտպանի եւ նրա ընտանիքի հետ քննարկումների արդյունքում որոշել են ֆուտբոլիստին չտանել Բաքու։

Նախկինում Մխիթարյանը բաց է թողել երկու արտագնա եվրագավաթային հանդիպումներ արդբեջանական ակումբների հետ։ 2017-ին Հենրիխ Մխիթարյանը Եվրոպայի լիգայի գավաթակիր դարձել է անգլիական «Մանչեսթեր Յունայթեդի» կազմում:  



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։