«Ենիսեյն» առաջարկել է Եվրոպայի լիգայի եզրափակիչն անցկացնել Կրասնոյարսկում

Կրասնոյարսկի «Ենիսեյը» հումորով է արձագանքել Հայաստանի հավաքականի եւ Լոնդոնի «Արսենալի» կիսապաշտպան Հենրիխ Մխիթարյանի՝ ֆուտբոլի Եվրոպայի լիգայի եզրափակիչին չմեկնելու որոշմանը:

«Ընկերներ, մենք լավագույն վայրն ունենք Եվրոպայի լիգայի եզրափակիչի համար»,- տնային ստադիոնի լուսանկարի տակ գրել է ռուսական ակումբի թվիթերյան էջը:

Հիշեցնենք, որ «Ենիսեյում» է հանդես գալիս Հայաստանի հավաքականի հարձակվող Արթուր Սարկիսովը: Այս մրցաշրջանում թիմը դուրս էր մնացել Ռուսաստանի Պրեմյեր լիգայից:

Մայիսի 29-ին Ադրբեջանի մայրաքաղաք Բաքվում կայանալիք եզրափակիչում «Արսենալի» մրցակիցը կլինի Լոնդոնի «Չելսին»:

Ավելի վաղ ՈւԵՖԱ-ն եւ Ադրբեջանի իշխանությունը «Արսենալին» եւ Մխիթարյանին տվել էին անվտանգության երաշխիքներ, սակայն լոնդոնյան ակումբը մայիսի 21-ին հայտարարեց, որ հայ կիսապաշտպանի եւ նրա ընտանիքի հետ քննարկումների արդյունքում որոշել են ֆուտբոլիստին չտանել Բաքու։

Նախկինում Մխիթարյանը բաց է թողել երկու արտագնա եվրագավաթային հանդիպումներ արդբեջանական ակումբների հետ։ 2017-ին Հենրիխ Մխիթարյանը Եվրոպայի լիգայի գավաթակիր դարձել է անգլիական «Մանչեսթեր Յունայթեդի» կազմում:

Guys, we have got the best place for #UELfinal @EuropaLeague @ChelseaFC @Arsenal @HenrikhMkh pic.twitter.com/9sAGM0hfMX

— FC Enisey English (@FCEniseyEN) May 21, 2019