Էստոնական «Տրանս Նարվա» ակումբի, Երեւանի «Արարատի», «Կիլիկիայի», «Ուլիսի» ու Հայաստանի երիտասարդական հավաքականի նախկին ֆուտբոլիստ Լեւոն Ղասաբօղլյանը նախորդ տարվա հուլիսից մարզչական գործունեությամբ է զբաղվում Ղազախստանում:
NEWS.am Sport-ի թղթակից հետ զրույցում 33-ամյա մարզիչը պատմեց Ղազախստան տեղափոխության մասին:
«Գործնական առաջարկ ստացա Ղազախստանից եւ որոշեցի տեղափոխվել այստեղ: Դրանից առաջ աշխատում էի Երեւանի «Արցախի» մարզչական շտաբում: Երբ ակումբի ղեկավարության որոշմամբ Արմեն Սանամյանը հեռացավ թիմի գլխավոր մարզիչի պաշտոնից, ես եւս շնորհակալություն հայտնեցի ակումբի ղեկավարությանը եւ հեռացա թիմից: Շարունակում եմ հետեւել «Արցախի» ելույթներին, Հայաստանում տեղի ունեցող ֆուտբոլային իրադարձություններին եւ շատ եմ ուրախանում հաջողություններով: Այդ ժամանակ Տիգրան Պետրոսյանի հետ աշխատում էի նաեւ Հայաստանի մինչեւ 14 տարեկանների հավաքականում: Հետո որոշվեց միավորել 2 հավաքականները եւ այնպես ստացվեց, որ ես հեռացա թիմից: Դրանից հետո որոշ ժամանակ չէի աշխատում եւ Ղազախստանից ստացված առաջարկը եղավ ճիշտ ժամանակին:
Ղազախստանում նախ աշխատեցի «Ալաշ» ակումբում, որը նորաստեղծ մանկապատանեկան ակադեմիա է եւ ունի հեռանկարային ծրագրեր: Նրանց նպատակն է ֆուտբոլիստներ պատրաստել տարբեր տարիքային հավաքականների համար: Երեւանում կայանալիք ՈւԵՖԱ-ի Զարգացման մրցաշարի մասնակցության համար ձեւավորված Ղազախստանի մինչեւ 14 տարեկանների հավաքականը կազմվել է հենց իմ թիմի բազայի վրա: Առաջարկ եղավ, որ հենց ես գլխավորեմ այդ թիմը, սակայն «Ֆուտբոլը բարեկամության համար» միջազգային ծրագրի 7-րդ մրցաշրջանի պատճառով շատ զբաղված եմ եւ չէի կարող համատեղել 2 աշխատանքները: Ես այդ ծրագրի ռեգիոնալ կազմկոմիտեի անդամ եմ: Այս պահին դադարեցրել եմ ակտիվ գործունեությունն «Ալաշ» ակումբում: Անկեղծ ասած, արդեն ցանկանում եմ ուժերս փորձել ոչ թե պատանեկան թիմերում, այլ՝ մեծահասակների: Շատ ուրախ եմ նաեւ, որ իմ նախկին 5-6 սաներ ընդգրկվել են Հայաստանի մինչեւ 14 տարեկանների հավաքականում»,- նշեց Լեւոն Ղասաբօղլյանը:
Երիտասարդ մասնագետը պատմեց նաեւ «Ֆուտբոլը բարեկամության համար» ծրագրի նպատակների ու առաքելության մասին: Ծրագրի 7-րդ մրցաշրջանը տեղի կունենա մայիսի 28-ից հունիսի 2-ը Իսպանիայի մայրաքաղաք Մադրիդում: Այս տարի եւս Հայաստանը կունենա ներկայացուցիչ:
«Արդեն երրորդ տարին մասնակցում եմ «Ֆուտբոլը բարեկամության համար» ծրագրին: Այս տարի ձեւաչափը փոխվեց, եւ յուրաքանչյուր երկիր կունենա ոչ թե մեկ խաղացող, այլ՝ 3: Ընդ որում՝ 3 մասնակիցներից մեկը պետք է լինի աղջիկ: Այդ պատճառով մենք ընտրեցինք Երեւանի «Բանանց» ակումբը, որն ունի աղջիկների թիմեր: Շնորհակալ եմ «Բանանցին» արձագանքելու եւ մեզ ամեն հարցով օժանդակելու համար:
Մադրիդում ծրագրի մասնակիցները ներկա կլինեն նաեւ Չեմպիոնների լիգայի եզրափակիչին եւ կհանդիպեն աստղային ֆուտբոլիստների: Կարծում եմ՝ դա շատ հետաքրքիր կլինի պատանի ֆուտբոլիստների համար: Այստեղ այնքան էլ կարեւոր չէ, թե որ թիմերը կհաղթեն, այլ կարեւոր է երեխաների շփումն ու այդ ամենը տեսնելը: Նրանք ամբողջ կյանքում կհիշեն դա: Կցանկանայի, որ մեր լրատվամիջոցներն ավելի ակտիվ լուսաբանեին այս միջոցառումը, քանի որ մյուս երկրներում այդպես է: Շատ կարեւոր է, որ երեխաները զգան այդ ուշադրությունը:
Մաիսի 16-ին կժամանեմ Հայաստան: Կան որոշ աշխատանքներ, որոնք պետք է կատարենք երեխաների հետ: Հույս ունեմ, որ այնտեղից կվերադառնանք լավ արդյունքներով ու տրամադրությամբ»,- նշեց Լեւոն Ղասաբօղլյանը:
Նշենք, որ Լեւոն Ղասաբօղլյանը Երեւանի «Արարատի» նախկին ֆուտբոլիստ, մարզիչ Սամվել Ղասաբօղլյանի որդին է: Հայաստանում նա մարզական կարիերան սկսել է «Փյունիկի» մարզադպրոցում:
Հետևեք NEWS.am SPORT-ին Facebook-ում, Twitter և Telegram-ում