Հակոբ Սերոբյան. Եվրոպական խաղերում սպասվում է շատ լուրջ մրցակցություն

Արթուր Թովմասյանը կմասնակցի Եվրոպական խաղերին, պաշտոնապես ստացել ենք նրա հրավերը: Այս մասին NEWS.am Sport-ի թղթակցի հետ զրույցում ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:

Լեհաստանում ապրիլի 10-14-ը կայացած Եվրոպայի առաջնությունում խաղարկվում էին Եվրոպական խաղերի ուղեգրեր: Հայաստանի հավաքականը նվաճել էր երկու ուղեգիր՝ օղակների վարժությունում բրոնզե մեդալակիր Վահագն Դավթյանն ու բազմամարտւմ 8-րդ տեղը զբաղեցրած Արթուր Դավթյանը: Եվրոպայի առաջնությունից հետո Հակոբ Սերոբյանը հայտարարել էր, որ Եվրոպական խաղերի ուղեգիր ստանալու հնարավորություն ունի նաեւ Արթուր Թովմասյանը:

«Արդեն հայտնել էի, որ շատ հնարավոր է՝ Արթուր Թովմասյանն ուղեգիր ստանա: Ինչպես եւ կանխատեսում էի, Ռուսաստանը հրաժարվեց իրենց օղակների վարժության մի ուղեգրից եւ այն պաշտոնապես տրվեց Արթուր Թովմասյանին, քանի որ նա Եվրոպայի առաջնությունում 7-րդ տեղն էր զբաղեցրել: Եվրոպական խաղերին կմասնակցենք 3 մարմնամարզիկով՝ Արթուր Թովմասյան, Արթուր Դավթյան, Վահագն Դավթյան: Այս մրցումները շատ կարեւոր են մեզ համար, սպասվում է շատ լուրջ մրցակցություն: Մարմնամարզությունում մասնակցելու են միայն 48 ուժեղագույն մարզիկները»,- ասաց Հակոբ Սերոբյանը:

Հիշեցնենք, որ Եվրոպական խաղերը կանցկացվեն հունիսի 21-ից հուլիսի 1-ը Բելառուսի մայրաքաղաք Մինսկում:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում