Ֆուտբոլի Հայաստանի ազգային հավաքականի գլխավոր մարզիչ Արմեն Գյուլբուդաղյանցի հետ Բոսնիա-Հերցեգովինայի թիմի դեմ Եվրո-2020-ի ընտրական փուլի J խմբի առաջին տուրի հանդիպման նախախաղային ասուլիսին ներկայացել էր գերմանական «Յան Ռեգենսբուրգի» կիսապաշտպան Սարգիս Ադամյանը, որը խոսեց առաջիկա խաղի մասին, Սարաեւոյից փոխանցում է NEWS.am Sport-ի թղթակիցը:
«Սպասելիքների մասին կասեմ, որ պետք է խաղանք դուխով, մարզիչը նշել է, որ այդ դեպքում կարող ենք հասնել արդյունքի: Ակումբի կազմում առաջնության բոլոր խաղերին մասնակցել եմ եւ գտնվում եմ լավ մարզավիճակում: Ինձ համար միեւնույն է, թե որ դիրքում հանդես կգամ հավաքականում: Դա կորոշի մարզիչը: Ընտրական փուլի նոր գնդակների մասին կասեմ, որ գնդակը կարեւոր չէ ինձ համար»,- ասաց ֆուտբոլիստը:
Հայաստանի եւ Բոսնիա-Հերցեգովինայի հավաքականների միջեւ հանդիպումը կկայանա մարտի 23-ին Սարաեւոյի «Գրբավիցա» ստադիոնում եւ կսկսվի Երեւանի ժամանակով 23:45:
Հանդիպումը կսպասարկի Դանիան ներկայացնող մրցավարական անձնակազմ՝ Յակոբ Կելետի գլխավորությամբ:
Այդ խաղից 3 օր անց Հայաստանի հավաքականը Երեւանում կընդունի Ֆինլանդիայի թիմին: J խմբում ընդգրկված են նաեւ Իտալիայի, Հունաստանի եւ Լիխտենշտեյնի հավաքականները:
Հիշեցնենք, որ Բոսնիա-Հերցեգովինայի եւ Հայաստանի հավաքականները հանդիպել են նաեւ 2010թ. աշխարհի առաջնության ընտրական փուլում: Երեւանում բոսնիացիները հաղթել էին 2:0 հաշվով, իսկ տանը՝ 4:1:
Դավիթ Եղիազարյան՝ Սարաեւոյից
NEWS.am Sport-ը լուսաբանումն իրականացնում է UCOM-ի աջակցությամբ
Հետևեք NEWS.am SPORT-ին Facebook-ում, Twitter և Telegram-ում