Հայաստանի առաջնությանը միայն երկու մարզից մասնակից ունենք, քանի որ մյուս մարզերում մարզադպրոցներ, դահլիճներ ու պայմաններ չունենք:
Այս մասին NEWS.am Sport-ի թղթակցի հետ զրույցում ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:
Երեւանի Ալբերտ Ազարյանի անվան մարզադպրոցում մեկնարկել է սպորտային մարմնամարզության Հայաստանի առաջնությունը, որին մասնակցում է շուրջ 50 մարզիկ Երեւանից, Էջմիածնից եւ Գյումրիից:
Հայաստանի առաջնությանը մասնակցում են բոլոր առաջատար մարմնամարզիկները՝ աշխարհի բրոնզե մեդալակիր Հարություն Մերդինյանը, Եվրոպայի փոխչեմպիոններ Արթուր Դավթյանը, Վահագն Դավթյանը, Արթուր Թովմասյանը:
Բազմամարտի չեմպիոնի կոչումը նվաճել է Արթուր Դավթյանը։
«Մոտ 55 մասնակից ունենք՝ 35 տղա, 20 աղջիկ: Այս տարի մեծ մասնակցություն ունեն երիտասարդները: Արդեն որակավորման փուլն ավարտվում է, եւ երիտասարդներն ուրախացնում են, վատ տպավորություն չունեմ: Երեւանից մասնակցում են Ալբերտ Ազարյանի, Հրանտ Շահինյանի մարզադպրոցները, Էջմիածնի եւ Գյումրիի մարզադպրոցները: Այսքան մասնակից էլ, որ ունենք, գոհ ենք: Մյուս մարզերից չունենք մասնակիցներ, քանի որ մարզերում մարզադպրոցներ, դահլիճներ չունենք; Վանաձորում ունենք դահլիճ, շատ փոքր է եւ միայն պատանիներ են մարզվում, որոնք դեռ պատրաստ չեն մեծերի հետ Հայաստանի առաջնության մասնակցել»,- ասաց Հակոբ Սերբոյանը:
Առաջնությունը կտեւի 3 օր: Մեկնարկային օրը մարմնամարզիկները մասնակցեցին նաեւ առանձին գործիքների որակավորման փուլին: Մարտի 13-ին Հրանտ Շահինյանի անվան մարզադպրոցում կկայանա աղջիկների որակավորման փուլը, իսկ մարտի 14-ին՝ երզափակիչները:
Հայաստանի առաջնությանը հետեւում է եռակի օլիմպիական չեմպիոն, աշխարհի առաջնությունների քառակի չեմպիոն, Հայաստանի մարմնամարզության ֆեդերացիայի նախագահ Ալբերտ Ազարյանը:
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում