Եվրոպայի առաջնությանը կմոտենանք ուժեղ կազմով, կմասնակցեն բոլոր այն մարզիկները, որոնք կհավակնեն մեդալի:
Այս մասին NEWS.am Sport-ի թղթակցի հետ զրույցում ասաց ծանրամարտի տղամարդկանց Հայաստանի հավաքականի գլխավոր մարզիչ Փաշիկ Ալավերդյանը:
Հայաստանի հավաքականը պատրասվում է ապրիլի 6-14-ը Բաթումիում կայանալիք Եվրոպայի առաջնությանը: Փաշիկ Ալավերդյանի գլխավորած թիմն այս օրերին ուսումնամարզական հավաք է անցկացնում Ծաղկաձորի մարզաբազայում:
«10 հոգանոց թիմով կմեկնենք Բաթումի: Բայց դեռ վերջնական պարզ չէ, թե ովքեր կլինեն կազմում: Լինելու են բոլոր նրանք, ովքեր լիարժեք պատրաստ են մեդալ նվաճել: Եվրոպայի առաջնությունը երկրորդն է վեց օլիմպիական վարկանիշային մրցաշարերից: Այս պահին տղաներն արդեն հավաքում են համապատախան մարզավիճակ: Կանցկացնենք եւս երկու հավաք՝ Երեւանում եւ Աբովյանում:
Կանանց հավաքականը եւս կմասնակցի Եվրոպայի առաջնությանը: Թիմը դեռ շատ երիտասարդ է եւ դեռեւս մեծ ակնկալիքներ չունենք: Նրանց հետ այս պահին աշխատում է Վիգեն Խաչատրյանը, բայց արդեն հավաքական է հրավիրվել Արտաշես Ներսիսյանը: Ցավոք, դեռ օրենքով նա իրավունք չունի թիմ տանել միջազգային մրցաշարերի, բայց թիմի հետ նրա աշխատանքը կշարունակվի: Քանի որ որակազրկված ենք եղել, միջազգային ֆեդերացիան մեզ միայն երկուական ուղեգրի հնարավորություն է տալիս Տոկիո-2020-ի համար: Տեսնենք կկարողանանք դարձնել 4: Ամեն ինչ կանեմ, որ միջազգային ֆեդերացիայի հաջորդ նիստում այս հարցը առաջ քաշեմ»,- ասաց Փաշիկ Ալավերդյանը:
Լուսինե Շահբազյան
Ֆոտո՝ Արսեն Սարգսյան
Հետևեք NEWS.am SPORT-ին Facebook-ում, Twitter և Telegram-ում