Լոնդոնի «Արսենալի» իսպանացի գլխավոր մարզիչ Ունաի Էմերին խոստովանել է, որ իր ղեկավարած թիմի համար բարդ է պայքարել Անգլիայի առաջնության մրցանակային եռյակում տեղ գրավելու համար:
«Իհարկե, կան մեզնից ուժեղ թիմեր: Պետք է խոստովանել, որ լավագույն քառյակի համար պայքարում մենք հետնապահ ենք: Հիմա «Արսենալը» 6-րդն է, այդպիսին է իրականությունը: Մենք դեռ հավատում ենք, որ կարող ենք առաջնությունն ավարտել լավագույն քառյակում, բայց հրաշալի պատկերացնում ենք, որ դա բարդ կլինի:
Առաջին եռյակում գտնվող «Մանչեսթեր Սիթիի», «Լիվերպուլի», «Տոտենհեմի» եւ մեր միջեւ տարբերությունը հսկայական է: Բայց «Չելսիի» եւ «Մանչեսթեր Յունայթեդի» հետ կարող ենք մրցակցել»,- Էմերիի խոսքը մեջբերում է Goal.com-ը:
Անգլիայի առաջնության 26-րդ տուրում «Արսենալը» փետրվարի 9-ին կհյուրընկալվի «Հադերսֆիլդին»: Հանդիպումը կմեկնարկի Երեւանի ժամանակով 19:00-ին: Սպասվում է Հայաստանի հավաքականի եւ «Արսենալի» կիսապաշտպան Հենրիխ Մխիթարյանի վերադարձը Պրեմյեր լիգա ոտքի կոտրվածքից հետո:
Հետևեք NEWS.am SPORT-ին Facebook-ում, Twitter և Telegram-ում