Անգլիայի հավաքականի ու «Բարսելոնայի» նախկին ֆուտբոլիստ, BBC Sport ու BT Sport հեռուստաընկերությունների մեկնաբան եւ փորձագետ Գարի Լինեկերը կարծում է, որ Թուրինի «Յուվենտուսի» պորտուգալացի հարձակվող Կրիշտիանու Ռոնալդուն սխալ է թույլ տվել՝ հրապարակելով լուսանկար ինքնաթիռից: Նախօրեին ֆուտբոլային հանրությունը միավորվել էր Անգլիայի Պրեմյեր լիգայում հանդես եկող «Կարդիֆ Սիթիի» նորեկ Էմիլիանո Սալային տեղափոխող ինքնաթիռի անհետացման առթիվ:
«Այդպիսի հրապարակման օրը չէ: Դա, իրոք, ճիշտ չէ»,- թվիթերյան էջում գրել է Լինեկերը:
Հիշեցնենք որ արգենտինացի հարձակվողին տեղափոխող ինքնաթիռն անհետացել էր Ֆրանսիայի Նանտ քաղաքից Ուելսի մայրաքաղաք Կարդիֆ ուղեւորվելիս: Ինքնաթիռը նախատեսված վայրեջքից մեկ ժամ առաջ ռադարների էկրանից անհետացել էր Լա Մանշի ջրերի վրա: Որոնողական աշխատանքները շարունակվում են, ինքնաթիռի եւ ուղեւորների ճակատագրի վերաբերյալ ոչ մի տեղեկություն դեռ չկա:
Piper Malibu թեթեւ ինքնաթիռում Սալայից բացի եղել էր միայն օդաչուն: Նա Ուելս էր մեկնել նույն ինքնաթիռով, որով օրեր առաջ Ֆրանսիա էր վերադարձել «Կարդիֆ Սիթիի» հետ պայմանագիր կնքելուց հետո:
Ուելսյան ակումբը նախորդ շաբաթ էր պայմանագիր կնքել Էմիլիանո Սալայի հետ, որը 2015 թվականից հանդես էր գալիս ֆրանսիական «Նանտում»: 28-ամյա ֆուտբոլիստի տրանսֆերը (20,5 միլիոն եվրո) ռեկորդային է եղել «Կարդիֆի» համար:
Not the day for this tweet. It really isn’t. https://t.co/61y6cgEzm0
— Gary Lineker (@GaryLineker) January 22, 2019
Հետևեք NEWS.am SPORT-ին Facebook-ում, Twitter և Telegram-ում