«Մանչեսթեր Յունայթեդի» գլխավոր մարզիչի հիմնական թեկնածուները

«Մանչեսթեր Յունայթեդի» գլխավոր մարզիչի պաշտոնից պորտուգալացի Ժոզե Մոուրինյոյի հեռացումից հետո բրիտանական եւ միջազգային մամուլը կազմել է անգլիական ակումբի հաջորդ գլխավոր մարզիչի հիմնական թեկնածուների ցուցակը։ Առաջին տեղում է մայիսին Մադրիդի «Ռեալից» հեռացած ֆրանսիացի Զինեդին Զիդանը, որը դեռ չունի աշխատանք։ Գործազուրկ է նաեւ Լոնդոնի «Չելսիից» հեռացած իտալացի Անտոնիո Կոնտեն, որը եւս համարվում է «Մանչեսթեր Յունայթեդի» գլխավոր մարզիչի հիմնական թեկնածուներից մեկը։ Ցուցակում են նաեւ ՊՍԺ–ի եւ Ֆրանսիայի հավաքականի նախկին գլխավոր մարզիչ Լորան Բլանը, Լոնդոնի «Տոտենհեմի» գլխավոր մարզիչ Մաուրիսիո Պոչետինոն։

Sky Sports-ի համաձայն՝ մինչեւ այս մրցաշրջանի ավարտը «Մանչեսթեր Յունայթեդը» կգլխավորի թիմի նախկին ավագ Մայքլ Կարիկը: Անգլիայի հավաքականի նախկին կիսապաշտպանը նախորդ մրցաշրջանի վերջում էր ավարտել կարիերան եւ ընդգրկվել «Մանչեսթեր Յունայթեդի» մարզչական շտաբում: Նա անգլիական ակումբում խաղացել է 2006-2018-ը:

Հիշեցնենք, որ 55-ամյա Մոուրինյոն «Մանչեսթեր Յունայթեդը» գլխավորում էր 2016 թվականից: Այս ընթացքում թիմը նվաճել է Անգլիայի Սուպերգավաթը, Անգլիական լիգայի գավաթը եւ Եվրոպայի լիգայի հաղթողի կոչումը: Պորտուգալացի մասնագետի գործող պայմանագիրը նախատեսված էր մինչեւ 2020 թվականի հուլիս:

Անգլիայի առաջնության 17 տուրից հետո «Մանչեսթեր Յունայթեդը» 26 միավորով 6-րդ տեղում է: Պրեմյեր լիգայի 17 խաղերում թիմը խփել եւ բաց է թողել 29-ական գոլ: Չեմպիոնների լիգայում մանչեսթերցիները դուրս են եկել 1/8 եզրափակիչ, որտեղ կմրցեն ֆրանսիական ՊՍԺ-ի հետ:

Հետևեք NEWS.am SPORT-ին Facebook-ում, Twitter և Telegram-ում