Անգլիայի առաջնության 14-րդ տուրում տեղի ունեցավ Հյուսիսային Լոնդոնի դերբին «Արսենալի» եւ «Տոտենհեմի» միջեւ: 4:2 հաշվով հաղթանակ տարավ «Արսենալը»: Դուբլի եւ գոլային փոխանցման հեղինակ դարձավ գաբոնցի հարձակվող Պյեր-Էմերիկ Օբամեյանգը: Ֆրանսիացի Ուգո Լյորիսի պաշտպանած դարպասը գրավեցին նաեւ ֆրանսիացի հարձակվող Ալեքսանդր Լյակազեթը եւ ուրուգվայցի պաշտպան Լուկաս Տորեյրան, որն առաջին գոլը խփեց «Արսենալում»:
Հյուրերի կազմում աչքի ընկան անգլիացիներ Էրիկ Դայերն ու Հարի Քեյնը:
Հայաստանի հավաքականի կիսապաշտպան Հենրիխ Մխիթարյանն իսպանացի Ունաի Էմերիի գլխավորած թիմի մեկնարկային կազմում էր, սակայն մասնակցեց միայն առաջին խաղակեսին՝ փոխարինվելով ընդմիջմանը: Հայ ֆուտբոլիստի փոխարեն խաղադաշտ դուրս եկավ ուելսցի կիսապաշտպան Աարոն Ռեմզին, որը կատարեց երկու գոլային փոխանցում:
«Արսենալը» 30 միավորով հավասարվեց «Տոտենհեմին» եւ գոլերի տարբերությամբ բարձրացավ չորրորդ տեղ: «Տոտենհեմը» 5-րդն է:
Անգլիայի առաջնություն, 14-րդ տուր
«Արսենալ» - «Տոտենհեմ»՝ 4:2 (տեսանյութ)
Պյեր-Էմերիկ Օբամեյանգ, 10, 11մ, 56, Ալեքսանդր Լյակազեթ, 75, Լուկաս Տորեյրա, 77 – Էրիկ Դայեր, 30, Հարի Քեյն, 34, 11մ
Հեռացում՝ Յան Վերտոնգեն («Տոտենհեմ»), 85, երկրորդ դեղին քարտ
Հետևեք NEWS.am SPORT-ին Facebook-ում, Twitter և Telegram-ում