Հիմա ես հրաշալի մարզավիճակում եմ: Հուսով եմ՝ դա կցուցադրեմ խաղադաշտում եւ կարդարացնեմ սպասելիքները:
Այս մասին NEWS.am Sport-ի թղթակցի հետ զրույցում ասաց Լյուքսեմբուրգի փոխչեմպիոն «Պրոգրես Նիդերկորնի» հարձակվող Ալեքսանդր Կարապետյանը, որը 4 տարվա ընդմիջումից հետո հրավիրվել է Հայաստանի ազգային հավաքական՝ մասնակցելու Ջիբրալթարի (նոյեմբերի 16) ու Լիխտենշտեյնի (նոյեմբերի 19) դեմ Ազգերի լիգայի խմբային փուլի վերջին 2 խաղերին:
Գերմանական ֆուտբոլային դպրոցի սանը Հայաստանի հավաքականի կազմում նորամուտը նշել է 2014 թվականին, երբ ազգային թիմը գլխավորում էր շվեյցարացի մասնագետ Բեռնար Շալանդը: Այդ տարի նա մասնակցեց սերբերի դեմ Եվրո-2016-ի ընտրական հանդիպմանն ու Ֆրանսիայի հավաքականի հետ ընկերական խաղին, ինչից հետո այլեւս չէր հրավիրվում ազգային թիմ:
4 տարվա ընդմիջումից հետո դու դարձյալ հրավիրվել ես Հայաստանի հավաքական: Այս ընթացքում սպասում էիր, որ դարձյալ հրավեր կստանաս հավաքականից:
Անցել է երկար ժամանակ, սակայն ես ջանասիրաբար աշխատում եմ ամեն օր: Ազգային հավաքական վերադառնալու համար երբեք կանգ չեմ առել:
Լյուքսեմբուրգի նախորդ առաջնությունում դարձար 29 գոլի հեղինակ եւ երկրորդ տեղը գրավեցիր ռմբարկուների ցուցակում, իսկ այս մրցաշրջանում խփել ես ընդամենը 3 գոլ: Արդյո՞ք դա վկայում է այն մասին, որ Լյուքսեմբուրգի առաջնությունը դարձել է ավելի ուժեղ:
Լյուքսեմբուրգի ֆուտբոլն առաջադիմում է ամեն տարի: Սակայն այս տարի ես լիցենզիայի հետ կապված խնդիրներ ունեի իմ ընկերություններում եւ առաջացել էին որոշ հարցեր, որոնց պատճառով բաց թողեցի մարզումներ: Սակայն վերջին 2 շաբաթներին վերադարձել եմ ինտենսիվ մարզումներին:
Ի՞նչ մարզավիճակում ես հիմա: Ի՞նչ սպասենք քեզանից առաջիկա խաղերում:
Հիմա ես հրաշալի մարզավիճակում եմ: Հուսով եմ՝ դա կցուցադրեմ խաղադաշտում եւ կարդարացնեմ սպասելիքները:
Հայաստանի հավաքականում բացակայության ընթացքում կապ պահպանո՞ւմ էիր ազգային թիմի խաղացողների հետ:
Հավաքականի խաղացողների ելույթներին հետեւում եմ, բայց կապ պահպանում էի միայն դարպասապահ Արսեն Բեգլարյանի հետ:
Հայաստանի հավաքականն առաջիկա 2 խաղերն անցկացնելու է հյուրընկալվելիս: Ըստ քեզ՝ ինչ մարտավարությամբ պետք է խաղալ Ջիբրալթարի ու Լյուքսեմբուրգի հավաքականների հետ, որոնք եվրոպական ամենաթույլ թիմերից են:
Կարծում եմ՝ փոքր հավաքականների դեմ պետք է ցուցադրել հարձակողական ֆուտբոլ եւ, դիմելով պրեսինգի, թույլ չտալ խաղալ մրցակցին:
Մեր նախորդ զրույցի ժամանակ նշել էիր, որ Հայաստանի հավաքականում նորամուտից հետո քո խաղաոճը լիովին փոխվել է այս ընթացքում: Ո՞ր խաղային դիրքում ես ամենահարմարավետը զգում քեզ:
Այո, այժմ ես բոլորովին այլ խաղացող եմ: Դարձել եմ ավելի ինքնավստահ ու ագրեսիվ խաղացող: Առջեւի գծում կարող եմ խաղալ բոլոր դիրքերում:
Լյուքսեմբուրգի առաջնության նախորդ տուրում դու դարձար դուբլի հեղինակ, իսկ մինչեւ այդ ընդամենը մեկ գոլ էիր խփել այս մրցաշրջանում: Արդյո՞ք Հայաստանի հավաքականից ստացած հրավերը ոգեւորեց քեզ այդ խաղից առաջ:
Իհարկե, դա շատ ոգեւորեց ինձ՝ տալով ավելի շատ ուժ:
«Պրոգրես Նիդերկորնն» այնքան էլ հաջող չի մեկնարկել այս մրցաշրջանում եւ 11-րդ տուրից հետո 6-րդ տեղում է: Ի՞նչ որ բան փոխվել է թիմում:
Այս մրցաշրջանում մենք կորցրեցինք մեր ամենակարեւոր խաղացողներից մեկին՝ Օլիվեր Թիլին: Փոխվեց նաեւ մարզիչը եւ մի շարք խաղացողների խանգարեցին վնասվածքները: Սակայն մենք արդեն վերգտել ենք մեր խաղը:
Դավիթ Եղիազարյան
Ֆոտո՝ ՀՖՖ
Հետևեք NEWS.am SPORT-ին Facebook-ում, Twitter և Telegram-ում