Խառը մենամարտերի թեթեւ քաշային կարգում UFC չեմպիոն Խաբիբ Նուրմագոմեդովի հայր Աբդուլմանալ Նուրմագոմեդովը պատմել է, որ որդուն պատժելու է իռլանդացի Քոնոր Մաքգրեգորի հետ մենամարտից հետո դրսեւորած վարքի համար:
«Խաբիբի համար կլինեն ամենախիստ պատժամիջոցները: Այդ առումով շատ խիստ կլինեմ նրա հանդեպ: Ես նախազգուշացրել էի, որ ինձ համար կարգապահությունը պետք է լինի առաջին տեղում: Ութանկյունում դու անում ես այն ամենը, ինչ ցանկանում ես, իսկ դրանից դուրս դա քաղաքացիների սահմանն է, որտեղ կան երեխաներ, կանայք ու կողմնակի մարդիկ»,- Աբդուլմանալ Նուրմագոմեդովի խոսքը մեջբերում է «РЕН-ТВ»-ն:
Մենամարտից հետո ռուսաստանցի մարտիկը ներողություն է խնդրել իր վարքի համար:
Հիշեցնենք, որ Լաս Վեգասում տեղի ունեցած տիտղոսային մենամարտում Ռուսաստանը ներկայացնող մարտիկը չորրորդ ռաունդում հաղթել էր խեղդող հնարքով: Մաքգրեգորը հանձնվել էր:
Մենամարտից հետո մարզիկների թիմերի միջեւ բախում է եղել մարզադահլիճում, որը սադրել է Հաբիբը՝ դուրս գալով ութանկյունից: Նա հարձակվել է Մաքգրեգորի ընկեր Դիլոն Դենիսի վրա: Այդ պահին ութանկյուն է մտել Նուրմագոմեդովի մարտավկա Զուբայր Տուխուգովը եւ սկսել է կռվել Մաքգրեգորի հետ: Հաբիբը ոստիկանների ուղեկցությամբ լքել է դահլիճը: Չեմպիոնին գոտին չեն հանձնել:
Քոնոր Մաքրեգորը UFC-ում հանդես չէր գալիս 2016-ից: 2017-ին 30-ամյա իռլանդացին պրոֆեսիոնալ բռնցքամարտի կանոններով մենամարտեց 5 քաշային կարգերում աշխարհի չեմպիոն Ֆլոյդ Մեյվեզերի հետ եւ պարտվեց տեխնիկական նոկաուտով։
Հետևեք NEWS.am SPORT-ին Facebook-ում, Twitter և Telegram-ում