15:17  ,  20 սեպտեմբերի, 2018

Կրկնակի օլիմպիական չեմպիոն Ռոման Վլասովը չի մասնակցի ըմբշամարտի ԱԱ-ին

Հունահռոմեական ըմբշամարտի կրկնակի օլիմպիական չեմպիոն Ռոման Վլասովը չի մասնակցի հոկտեմբերին Բուդապեշտում կայանալիք աշխարհի առաջնությանը: Մարզումային հավաքի ժամանակ ստացած ծնկահոդի վնասվածքի պատճառով նա չի մասնակցի մրցաշարերի մինչեւ հունվար:

«Այսօր առավոտյան վիրահատվել եմ: Մենիսկի խնդիր էր: Ամեն ինչ գերազանց է անցել: Մոտ վեց շաբաթ կպահանջվի մինչեւ ապաքինումը: Ես դեռ շատ բան ունեմ ապացուցելու մրցագորգում: Այս դադարը միայն օգուտ կտա ինձ:

Մեր թիմին մաղթում եմ հաջողություն աշխարհի առաջնությունում: Անպայման Բուդապեշտում կհետեւեմ գոտեմարտերին եւ կերկրպագեմ մեր ըմբիշներին»,- Վլասովի խոսքը մեջբերում է Ռուսաստանի ըմբշամարտի ֆեդերացիայի կայքը:

Այս տարվա Եվրոպայի առաջնությունում Ռոման Վլասովը չեմպիոն էր հռչակվել 77 կգ քաշային կարգում: Հայաստանը ներկայացրել էր Կարապետ Չալյանը, սակայն մեդալ չէր նվաճել:

Հետևեք NEWS.am SPORT-ին Facebook-ում, Twitter և Telegram-ում