Ֆուտբոլի Հայաստանի ազգային հավաքականի 24-ամյա կիսապաշտպան Գոռ Մալաքյանը միացել էր նորաստեղծ «Արարատ-Արմենիային», որը հանդես կգա Հայաստանի Բարձրագույն խմբում:
«Մի քանի տարբերակ կար ուկրաինական ակումբներում հանդես գալու, բայց ես որոշեցի ընդունել «Արարատ-Արմենիայի» առաջարկը: Եղբորս՝ Էդգարի հետ, խորհդակցելով որոշեցինք, որ ճիշտ կլինի տեղափոխվել նորաստեղծ ակումբ:
Ճիշտ է՝ ակումբը նոր է, բայց նպատակը չեմպիոն դառնալն է, և երևի հենց չեմպիոնության համար պայքարելու միտքը գրավեց ինձ: Դժվար է լինելու, քանի որ բոլորիս ժամանակ է հարկավոր, որ ընտելանանք նոր միջավայրին: Ունենք լավ մարզչական կազմ և լավ ֆուտբոլիստներ, հուսով եմ միասին՝ մեր ղեկավարության աջակցությամբ, կհասնենք մեր ընդհանուր նպատակին»,- Գոռ Մալաքյանի խոսքը մեջբերում է ակումբի մամուլի ծառայությունը:
Գոռ Մալաքյանը «Արարատ-Արմենիայում» հանդես կգա 8 համարի խաղաշապիկով:
Նախկինում նա ներկայացրել է «Փյունիկ», «Ալաշկերտ» և «Շիրակ» ակումբները: Մինչեւ «Արարատ-Արմենիա» տեղափոխվելը եղել է ուկրաինական «Ստալի» կազմում: Հանդես է եկել Հայաստանի մինչև 17, 19 և 21 տարեկանների հավաքականներում: 2016 թվականից Հայաստանի ազգային հավաքականի անդամ է, որի կազմում անցկացրել է 12 խաղ:
Հետևեք NEWS.am SPORT-ին Facebook-ում, Twitter և Telegram-ում