Նոր թիմով, նոր հայ մարզիչով եւ նոր քաշային կարգում մայիսի 26-ին պրոֆեսիոնալ ռինգում կպայքարեմ չեմպիոնական գոտու համար:
Այս մասին NEWS.am Sport-ի թղթակցի հետ զրույցում ասաց Գերմանիայում հանդես եկող հայ պրոֆեսիոնալ բռնցքամարտիկ Լեոն Հարթը, որը մայիսի 26-ին Համբուրգում կանցկացնի 20-րդ մենամարտը պրոֆեսիոնալ ռինգում, կպայքարի IBO Continental չեմպիոնական գոտու համար, բայց իր համար նոր քաշային կարգում՝ կիսածանր քաշում: Նախորդ 19 մենամարտերում 29-ամյա բռնցքամարտիկը տարել է 16 հաղթանակ (12-ը նոկաուտով) եւ կրել 3 պարտություն:
«Առաջին անգամ մենամարտելու եմ կիսածանր քաշային կարգում՝ 79,4 կգ: Մինչ այս հանդես էի գալիս՝ 90,7 կգ: Շատ կարճ ժամանակում որոշեցի եւ փոխեցի քաշային կարգս: Այս պահին մարզական կարիերայիս համար սա էր ճիշտ որոշումը: 8 շաբաթում 15 կգ եմ իջեցրել: Գնում եմ չեմպիոնական մենամարտի լրիվ նոր աշխատանքային թիմով, նոր մենեջերով: Աշխատում եմ մարզիչ Արթուր Գրիգորյանի հետ:
Այս մենամարտս ինձ համար շատ կարեւոր է, քանի որ գոտու համար եմ պայարելու: Շատ լավ մարզավիճակում եմ: Մրցակիցս բավական ուժեղ բռնցքամարտիկ է. Չեխիայի առաջին համարը՝ Կարել Հորեսեկը:
Արդեն կայացել է իմ եւ մրցակցիս կշռման արարողությունը եւ հայացքների մենամարտը: Ես կշռում եմ 79,2 կգ, իսկ մրցակիցս՝ 79 կգ»,- ասաց Լեոն Հարթը:
Լեոն Հարթի նախորդ մենամարտը կայացել էր 2018 թվականի մարտի 24-ին Գերմանիայի Կարլսռուե քաղաքում, 8 ռաունդանոց մենամարտում մրցել էր բոսնիացի Ֆադիլ Պաշալիչի հետ եւ հաղթել ժամանակից շուտ։
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում