Իսպանիայի առաջնության 27-րդ տուրում «Ռեալը» Մադրիդում մրցեց «Խետաֆեի» հետ: Ֆրանսիացի Զինեդին Զիդանի գլխավորած թիմն առավելության հասավ 3:1 հաշվով: Հաշիվը բացեց ուելսցի Գարեթ Բեյլը, որը դարձավ Իսպանիայի առաջնություններում ամենաշատ (117) հանդիպում անցկացրած բրիտանացի ֆուտբոլիստը: Նա գերազանցեց Մադրիդի «Ռեալի» նախկին խաղացող, անգլիացի Դեւիդ Բեքհեմի ռեկորդը:
Այնուհետեւ դուբլի հեղինակ դարձավ պորտուգալացի հարձակվող Կրիշտիանու Ռոնալդուն, որի առաջին գոլը իր համար 300-րդն էր Իսպանիայի առաջնություններում:
«Բարսելոնայի» արգենտինացի հարձակվող Լիոնել Մեսիից հետո Ռոնալդուն դարձավ երկրորդ ֆուտբոլիստը, որին հաջողվում է հատել 300 գոլի սահմանագիծը Պրիմերայում:
«Խետաֆեն» 47-րդ րոպեից հանդես էր գալիս 10 ֆուտբոլիստներով: Երկրորդ դեղին քարտի համար հեռացվեց ֆրանսիացի հարձակվող Լոիկ Ռեմին:
«Ռեալը» 54 միավորով երրորդ տեղում է եւ 7 միավոր հետ է Մադրիդի «Աթլետիկոյից», որն այս տուրում կմրցի առաջատար «Բարսելոնայի» հետ:
Իսպանիայի առաջնություն, 27-րդ տուր
«Ռեալ» - «Խետաֆե»՝ 3:1
Գարեթ Բեյլ, 24, Կրիշտիանու Ռոնալդու, 45+1, 78 – Ֆրանսիսկո Պորտիլյո, 65, 11մ
Հեռացում՝ Լոիկ Ռեմի («Խետաֆե»), 47, երկրորդ դեղին քարտ
Հետևեք NEWS.am SPORT-ին Facebook-ում, Twitter և Telegram-ում