ՀԳՖ նախագահ. Թող ըմբշամարտից կամ բռնցքամարտից բյուջեն մի քիչ «մոնտաժեն», տան գեղասահքին

Մոսկվայում անցկացված գեղասահքի Եվրոպայի առաջնությունում Հայաստանի միակ մենասահորդ Սլավիկ Հայրապետյանն ու պարային զույգին հաջողվեց բավարարվել միայն վերջին տեղերով: Հայաստանի գեղասահքի ֆեդերացիայի նախագահ Մելանյա Ստեփանյանը Մոսկվայում հետեւել է Հայաստանի ներկայացուցիչների մրցելույթներին եւ գոհ է նրանց մասնակցությունից, իսկ ցածր միավորները եւ վերջին տեղերում լինելը պատճառաբանում է միջազգային մրցավար, տեխնիկական անձնակազմ եւ գումար չունենալով:

NEWS.am Sport-ի թղթակցի հետ զրույցում Մելանյա Ստեփանյանն ամփոփել է Եվրոպայի առաջնությունը, խոսել հայկական գեղասահքի խնդիրների մասին:

Տիկին Ստեփանյան, թեեւ հայ մարզիկները լավ ելույթներ ունեցան Եվրոպայի առաջնությունում, բայց ցածր միավորներով տեղ չգտան լավագույն տասնյակում: Ի՞նչն է խանգարում մեր գեղասահորդներին բարձր արդյունքներ գրանցել:

Ես իմ սաներից շատ գոհ եմ: Խոսք չունեմ թե Սլավիկ Հայրապետյանի մրցելույթներից, թե Թինա Կարապետյան - Սիմոն Սենեկալ զույգից:

Տղամարդկանց մենասահքում 18-ամյա Սլավիկ Հայրապետյանը փայլեց: Չեմ վախենում այդ խոսքից, ուղղակի խոսքեր չունեմ, հիացած եմ: Գեղասահքը շատ բարդ մարզաձեւ է: Եթե դու մարզվում ես 100 տոկոսով, մրցելույթներին ցուցադրում ես քո հնարավորությունների 50 տոկոսը. սա կհասկանան սառույցի վրա դուրս եկողները` հուզմունք, ոտքերի դող, սառույցի վրա պար, էմոցիաները: Գեղասահքը ոչ մի մարզաձեւի նման չէ, սառույց է եւ չի կարելի սառույցի հետ ուղղակի կատակ անել: Սլավիկ Հայրապետյանը կարող է մարզումների ընթացքում 3 ու կես, 4 պտույտով ցատկ անել, բայց դուրս գալ մրցասպարեզ եւ ձախողվել:

Սլավիկ Հայրապետյանի մասնակցությունից հիացած եմ: Նա հրաշալի հավաքվեց, լավ եւ արժանի ելույթներ ունեցավ թե կարճ, թե ազատ ծրագրում: Կարճ ծրագրում նա գրավեց 14-րդ տեղը, բայց վստահ 7-րդ տեղի արդյունք ցույց տվեց: Չեմ ցանկանում անդադար մրցավարների վրա գցել ցածր միավորները, բայց իրականությունն այն է, որ մենք միջազգային մրցավարի պակաս ունենք, այդ պատճառով Հայրապետյանը հայտնվեց 14-րդ տեղում: Ազատ ծրագրում էլ վատ չսահեց: Տղամարդկանց մենասահքում 37 մասնակից կար, եւ նրանց մեջ նա զբաղեցրեց 15-րդ տեղը: Բոլորն էլ վայր էին ընկնում, ռուսներն էլ էին ընկնում: Ուղղակի նրանց նկատմամբ ավելի մեղմ էին:

Թինա Կարապետյան - Սիմոն Սենեկալ պարային զույգի մասնակցությունն ինչպե՞ս եք գնահատում:

Նրանք նույնպես շատ լավ հանդես եկան: Պարային զույգերի մրցավարությունում «մաֆիան» ավելի ուժեղ է: Պարային զույգերի ծրագրում ով ինչ ուզում անում է, անվերահսկելի է. Ոչ մեկի հետ չի լինում խոսել: Մեր զույգը բավական հաջող հանդես եկավ եւ նրանք պետք է զբաղեցնեին գոնե 15-րդ տեղը, բայց 19-ում հայտնվեցին: Ոչինչ անել չէինք կարող:

Անաստասիա Գալուստյանն այս շրջանում, կարծես, մասնակցում է շոու-ծրագրերի, բայց այսօր նա դեռեւս շարունակում է մնալ Փհենչհան-2018-ի Օլիմպիական խաղերի պահեստային մասնակցի կարգավիճակում եւ այսքանով հանդերձ չհայտավորվեց ԵԱ-ին:

Անաստասիա Գալուստյանը Գերմանիայի Օբերսդորֆ քաղաքում կայացած օլիմպիական վարկանիշային մրցաշարից հետո շատ հիասթափվեց: Որոշ ժամանակ անց դադար խնդրեց, մենք փորձեցինք նրան օգնել, հոգեբանական աջակցություն ցույց տալ, բայց այս շրջանում նրան մարզական կարիերայի դադար էր պետք: Այս ընթացքում նա Մոսկվայում մասնակցում էր շոուների, որից մեկի ժամանակ վնասվածք է ստացել: Եվրոպայի առաջնությանը չհայտավորվեց վնասվածքի պատճառով եւ այդ ամենին գումարած նրա հիասթափությունը: Անաստասիան եւ Թինա Կարապետյանի զույգը այս պահին Օլիմպիական խաղերի առաջին պահեստայիններն են: Դեռեւս սպասում ենք, որ գուցե որեւէ մեկը հրաժարվի մասնակցությունից, անմիջապես մեր ուղեգիրը կուղարկեն:

Միջազգային կարգի մրցավարների պակասից բացի, մարզիկներն ի՞նչ խնդիրներ ունեն:

Մենք այսօր գումարի պակաս ունենք, ուրիշ ոչինչ: Լավ գեղասահորդներ ունենք, լավ ներուժ կա, մեր հավաքականի անդամները իսկապես լավ գեղասահորդներ էին:

Մենք այսօր արդեն սկսել ենք միջազգային մրցավարների պատրաստումը, բայց սա հետագայի հարց է: Մինչեւ մեր մրցավարները հասնեն այդ կարգին, որ միջազգային մրցաշարերից դուրս գան խոշոր մրցաշարեր դատելուն, այդ ժամանակ արդեն ոչ Սլավիկ Հայրապետյանը, ոչ էլ մյուսները չեն լինի սպորտում:

Սպորտի նախարարությունը, ՀԱՕԿ-ն ի՞նչով են աջակցում գեղասահքին:

Ինչով կարողանում,  օգնում են: Մենք ունենք բյուջե, բայց երբեք այն մեզ չի բավարարում: Եթե ես ունենամ գումար, օրինակ` Սլավիկ Հայրապետյանին կուղարկեմ մարզվելու ԱՄՆ-ում իմ մարզիչի` Ռաֆայել Հարությունյանի մոտ, ով անվանի մարզիչ է ամբողջ աշխարհում: Պարբերաբար խոսում եմ ղեկավարության հետ, որ ունենք գումարի կարիք, բայց ի՞նչ է փոխվում, ո՞վ է լսում … Թող ըմբշամարտից կամ բռնցքամարտից բյուջեն մի քիչ «մոնտաժեն», տան գեղասահքին…

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում