«Բարսելոնայի» արգենտինացի պաշտպան Խավյեր Մասկերանոն կարիերան կշարունակի չինական «Հեբեյ Չայնա» ակումբում, հայտնում է կատալոնական ակումբի կայքը:
Կողմերը փոխհամաձայնության են եկել Արգենտինայի հավաքականի 33-ամյա ֆուտբոլիստի տրանսֆերի հարցում:
Նախօրեին հայտնի էր դարձել, որ հունվարի 24-ին կկայանա Մասկերանոյի հրաժեշտին նվիրված արարողությունը, որին կմասնակցեն նաեւ «Բարսելոնայի» նախագահ Խոսեպ Մարիա Բարտոմեուն ու թիմի ֆուտբոլիստները: «Էսպանյոլի» դեմ հունվարի 25-ին կայանալիք գավաթային հանդիպումից հետո էլ արգենտինացին հրաժեշտ կտա «Բարսելոնայի» երկրպագուներին:
Խավյեր Մասկերանոն 2010-ին անգլիական «Լիվերպուլից» է տեղափոխվել «Բարսելոնա», որի հետ նրա պայմանագիրը նախատեսված է մինչեւ 2019 թվականի ամառը: Կատալոնական ակումբի կազմում նա անցկացրել է 334 պաշտոնական խաղ եւ նվաճել 18 տիտղոս:
Հետևեք NEWS.am SPORT-ին Facebook-ում, Twitter և Telegram-ում