Ծառուկյանի եւ երկրի նախագահի մեղքը չի, որ Գոռ Մինասյանը, Անդրանիկ Կարապետյանը եւ մեր մյուս մեդալակիրները չեն ընդգրկվել լավագույն տասնյակում: Նրանք պետք է չնեղվեն: Երկրի նախագահի հետ քննարկեցինք եւ որոշեցինք այս տարի եւ այսուհետ այսպես անցկացնել քվեարկությունը, որպեսզի հետո չլինեն զրույցներ, թե ինչու Պողոսը կա տասնյակում, իսկ Պետրոսը՝ ոչ:
Այս մասին Հայաստանի լավագույն մարզիկների պարգեւատրման արարողությանն ասաց ՀԱՕԿ նախագահ Գագիկ Ծառուկյանն, ով տասը լավագույն մարզիկներին պարգեւատրեց ավտոմեքենաներով:
«Երբ այսպիսի հաջողություններ են լինում սպորտում, դու քեզ լավ ես զգում, որ հայ ես, որ քո երկրի դրոշն է բարձրանում, հիմն է հնչում: Քանակով քիչ ենք, բայց մեր հաղթանակները շատ մեծ են: Երբ ըմբշամարտի աշխարհի առաջնությունում խաղարկվում է 7 ոսկի, որից երկուսը գալիս է քո երկիր, սա հպարտություն է: Եվրոպայի առաջնություններում, երբ մեր մարզիկները չեմպիոններն են դառնում, ուրախանում ես քո երկրի համար: Այս հաղթանակները մեզ մեծ ճանաչում են տալիս: Մեզ մեծ ճանաչում է բերում նաեւ Հենրիխ Մխիթարյանը. նա այսօր 50 լավագույն մարզիկների մեջ է: Այս տարի միայն 284 հազար անգամ հնչեցվել է «Հենրիխ Մխիթարյան» եւ «Արմենիա»: Նա իր անունով ճանաչել է տալիս ամբողջ աշխարհի Հայաստանը: Իսկ այսքան նրա անունը հիշատակելն աշխարհին ցույց է տալիս, որ Հայաստանն ունի այդպիսի ուժեղ ֆուտբոլիստ: Հենրիխ Մխիթարյանը մեծ հայրենասեր է, իսկ հաղթանակների պահերին հայոց եռագույնը նրա ձեռքին է:
Եթե 2016 թվականի 174 մեդալ էինք նվաճել, այս տարի մեդալների քանակը դարձել է 201` 61 ոսկե, 49 արծաթ, 91 բրոնզ: Դեռ շատ աշխատանք կա»,- ասաց Գագիկ Ծառուկյանը:
ՀԱՕԿ նախագահը նշեց, որ ՀՀ նախագահ Սերժ Սարգսյանի հետ քննարկման արդյունքում է որոշվել Հայաստանի լավագույն մարզիկների տասնյակի քվեարկությունը հանձնել Սպորտի նախարարությանը:
«Քանի որ լավագույն տասնյակի թեկնածուները 25-ն էին, որոշեցինք, եւ եթե նախորդ տարիների պես անցկացնեիք քվեարկությունը, շարունակվելու էին խոսակցությունները, թե ինչու Պողոսը կա, Պետրոսը չկա, որոշեցինք այս քվեարկությունը երկրի նախագահի հետ քննարկումների արդյունքում հանձնել Սպորտի նախարարությանը, որը նոր ձեւաչափ մշակեց: Այս տասնյակն ընտրել են հանրությունը եւ մարզական լրագրողները»,- ասաց ՀԱՕԿ նախագահը:
Լուսինե Շահբազյան
Ֆոտո՝ Արսեն Սարգսյան
Հետևեք NEWS.am SPORT-ին Facebook-ում, Twitter և Telegram-ում