Անգլիայի առաջնության երկրորդ տուրը մեկնարկեց «Սուոնսի» - «Մանչեսթեր Յունայթեդ» խաղով: Պորտուգալացի Ժոզե Մոուրինյոյի գլխավորած թիմը մեկնարկային տուրում «Վեստ Հեմի» նկատմամբ 4:0 հաշվով տպավորիչ հաղթանակից հետո Ուելսում դարձյալ հաղթեց 4:0 հաշվով: Երկրորդ հանդիպումն անընդմեջ երկու գոլային փոխանցման հեղինակ դարձավ Հայաստանի հավաքականի կիսապաշտպան Հենրիխ Մխիթարյանը, որը «Մանչեսթեր Յունայթեդի» մեկնարկային կազմում էր եւ փոխարինվեց 85-րդ րոպեին:
Հյուրերի առաջին գոլը առաջին խաղակեսի վերջին րոպեին խփեց կոտդիվուարցի պաշտպան Էրիկ Բային, որն առաջինը հասավ ֆրանսիացի կիսապաշտպան Պոլ Պոգբայի հարվածից հետո դարպասային գծից հետ եկած գնդակին:
Երկրորդ խաղակեսում «Մանչեսթեր Յունայթեդը» չորս րոպեում երեք գոլ խփեց: Երկու դեպքում գոլային փոխանցումները կատարեց Մխիթարյանը: Աչքի ընկան բելգիացի հարձակվող Ռոմելու Լուկակուն եւ Պոլ Պոգբան: Լեհ Լուկաշ Ֆաբիանսկու պաշտպանած դարպասը գրավեց նաեւ ֆրանսիացի հարձակվող Անտոնի Մարտիալը, որին արդյունավետ փոխանցում կատարեց Պոգբան:
«Մանչեսթեր Յունայթեդը» 6 միավորով գլխավորում է մրցաշարային աղյուսակը:
Անգլիայի առաջնություն, երկրորդ տուր
«Սուոնսի» - «Մանչեսթեր Յունայթեդ»՝ 0:4
Էրիկ Բայի, 45, Ռոմելու Լուկակու, 81, Պոլ Պոգբա, 82, Անտոնի Մարտիալ, 84
Հետևեք NEWS.am SPORT-ին Facebook-ում, Twitter և Telegram-ում