Մոուրինյո. Իմ ֆուտբոլիստները հիասթափված էին, որ «Ռեալը» ընդմիջումից հետո խաղաց երկրորդ կազմով

Անգլիական «Մանչեսթեր Յունայթեդի» գլխավոր մարզիչ Ժոզե Մոուրինյոն մեկնաբանել է International Champions Cup ընկերական մրցաշարի խաղում Մադրիդի «Ռեալի» նկատմամբ հաղթանակը հետխաղյա 11 մետրանոցներով:

«Սա լավ մարզում էր մեզ համար: Անցկացրեցինք հրաշալի առաջին խաղակես «Ռեալի» լավագույն ֆուտբոլիստների դեմ: Ընդմիջումից հետո կորցրինք մոտիվացիան ու խաղի հանդեպ ախորժակը մրցակցի երիտասարդ խաղացողների դեմ խաղալիս: Իմ՝ երկրորդ խաղակեսում դաշտ դուրս եկած ֆուտբոլիստները հիասթափված էին, քանի որ նրանց դեմ չէր խաղում «Ռեալի» հիմնական կազմը:

Թիմերն իրացրին 11 մետրանոց 10 հարվածներից միայն երեքը: Սակայն սա նախամրցաշրջանային պատրաստություն է, եւ ես չէիր ընտրել 11 մետրանոցների լավագույն իրացնողներին:

Ինչ վերաբերում է Անդեր Հերերայի վնասվածքին, ապա միշտ իմ խաղացողներին ասում եմ, որ ռիսկի չդիմեն ընկերական խաղերում: Պետք է սպասենք հետազոտության արդյունքներին: Եթե կա վնասվածքի որեւէ կասկած, ապա պետք է պահանջել փոխարինում»,- մարզիչի խոսքը մեջբերում է «Մանչեսթեր Յունայթեդի» կայքը:

Հիշեցնենք, որ ԱՄՆ-ի Սանտա Կլարա (Կալիֆորնիա) քաղաքի «Լիվայս» ստադիոնում կայացած հանդիպման հիմնական ժամանակն ավարտվել էր 1:1 հաշվով, եւ անմիջապես նշանակվել էր հետխաղյա 11 մետրանոց հարվածաշար, որում անգլիական ակումբը հաղթել էր 2:1 հաշվով: Հայաստանի ազգային հավաքականի կիսապաշտպան Հենրիխ Մխիթարյանը մասնակցել էր երկրորդ խաղակեսին եւ անվրեպ իրացրել հետխաղյա 11 մետրանոց հարվածը:

Ընդմիջմանը Մոուրինյոն կատարել էր 8 փոխարինում՝ դաշտ դուրս բերելով նաեւ Հենրիխ Մխիթարյանին, իսկ Արքայական ակումբի գլխավոր մարզիչ Զինեդին Զիդանը փոխարինել էր բոլոր խաղացողներին՝ ընտրելով երկրորդ կազմը:

«Մանչեսթեր Յունայթեդն» ԱՄՆ-ում վերջին ընկերական խաղը կանցկացնի հուլիսի 26-ին՝ Վաշինգտոնում մրցելով «Բարսելոնայի» հետ:

Հետևեք NEWS.am SPORT-ին Facebook-ում, Twitter և Telegram-ում