10:02  ,  19 հունիսի, 2017

Մինո Ռայոլա. Դոնարումայի ընտանիքին սպառնացել են

Ջանլուիջի Դոնարումայի ընտանիքին սպառնացել են, հայտարարել է «Միլանի» 18-ամյա իտալացի դարպասապահի գործակալ Մինո Ռայոլան:  Դոնարուման հրաժարվել է երկարաձգել պայմանագիրը, որն ավարտվում է 2018թ. ամռանը:

«Մենք ընդունել ենք որոշում եւ չենք ցանկանում շարունակել համագործակցությունը «Միլանի» հետ: Խնդիրը փողը չէ: Մեզ սպառնացել են: Դոնարումային ոչ միայն վախեցրել են խաղաժամանակ չտրամադրելով: Սպառնալիքներ է ստացել նրա ընտանիքը: Այժմ կա իրական վտանգ, որ նա հաջորդ մրցաշրջանում չի խաղա:

Դոնարուման չունի վերջնական համաձայնություն որեւէ ակումբի հետ: «Յուվենտուսը», «Ռեալը» նրան առաջարկներ են արել դեռ այն ժամանակ, երբ նա 14 տարեկան էր: Այժմ նրա արագ տեղափոխությունը տեղի չի ունենա: «Միլանի» մարզական տնօրեն Մասիմիլիանո Միրաբելիի հետ ունեմ վատ հարաբերություններ: Մենք տարբեր մարդիկ ենք: Նրա վարքը նման է հետապնդման մեր դեմ: Իրավիճակից ելք չեմ տեսնում»,- Ռայոլայի խոսքը մեջբերում է Football Italia-ն:

«Միլանի» չինացի նախագահ Յոնհոն Լին հայտարարել էր, որ Դոնարուման չի վաճառվի եւ մինչեւ պայմանագրի ավարտը այլեւս խաղադաշտ դուրս չի գա:

Հետևեք NEWS.am SPORT-ին Facebook-ում, Twitter և Telegram-ում