Ռիո-2016-ի կրկնակի օլիմպիական չեմպիոն, թրամարտի կանանց Ռուսաստանի հավաքականի առաջատար Յանա Եգորյանը հայտավորվել է Վրաստանում կայանալիք սուսերամարտի Եվրոպայի առաջնությանը՝ չնայած ոտքի մատի վնասվածքին: Այդ մասին հայտարարել է սուսերամարտի Ռուսաստանի հավաքականի գլխավոր մարզիչ Իլգար Մամեդովը:
«Յանա Եգորյանը հայտավորվել է մրցաշարին մասնակցելու համար: Բժիշկները կփորձեն վերականգնել Յանայի առողջությունն այն պայմանով, որ նա պետք է պահպանի բժշկական խորհրդատվություններն այս շաբաթվա ընթացքում: Այդ ժամանակ նա ի վիճակի կլինի մասնակցել Եվրոպայի առաջնությանը»,- Իլգար Մամեդովի խոսքը մեջբերում է «ТАСС»-ը:
Ավելի վաղ Ռուսաստանի սուսերամարտի ֆեդերացիայի մամուլի ծառայությունը հայտնել էր, որ Յանա Եգորյանը վնասվածքի պատճառով բաց է թողնելու Եվրոպայի առաջնությունը, որը կկայանա հունիսի 12-17-ը Թբիլիսիում:
Հիշեցնենք, որ ավելի վաղ Յանա Եգորյանը NEWS.am Sport-ի թղթակցի հետ զրույցում նշել էր, որ Ռիո-2016-ից հետո ծրագրել էր ժամանել Երեւան, բայց չստացվեց: Մարզուհու խոսքով՝ նա անպայման լինելու է Երեւանում, որտեղ ապրում է նրա հայրը՝ Կարապետ Ալավերդյանը:
Հետևեք NEWS.am SPORT-ին Facebook-ում, Twitter և Telegram-ում