Ֆուտզալի աշխարհի գործող չեմպիոն Բրազիլիայի հավաքականը չպաշտպանեց տիտղոսը: Կոլումբիայում ընթացող աշխարհի առաջնության 1/8 եզրափակիչում բրազիլացիները սենսացիոն պարտություն կրեցին Իրանի հավաքականից: Հանդիպման հիմնական ժամանակն ավարտվեց 3:3 հաշվով, լրացուցիչ ժամանակում թիմերը խփեցին մեկական գոլ, իսկ հետխաղյա 11 մետրանոցներն ավելի դիպուկ իրացրին իրանցիները: Ընդ որում՝ խաղի ժամանակ բրազիլացիները 2 անգամ ունեցել են 2 գոլի առավելություն։
Քառորդ եզրափակիչում Իրանի հավաքականի մրցակիցը կլինի Պարագվայը, որը պայքարից դուրս էր թողել կոլումբացիներին (1:0):
1/8 եզրափակիչի արգելքը հաղթահարեց նաեւ աշխարհի գործող փոխչեմպիոն Իսպանիայի հավաքականը, որը 5:2 հաշվով հաղթեց Ղազախստանին եւ հաջորդ փուլում կմրցի ռուսների հետ:
Հիշեցնենք, որ աշխարհի 5-ակի չեմպիոն բրազիլացիները հաղթել էին աշխարհի նախորդ 2 առաջնություններում:
Հետևեք NEWS.am SPORT-ին Facebook-ում, Twitter և Telegram-ում