Երեւանի Ալբերտ Ազարյանի անվան մարմնամարզության մարզադպրոցում կայացավ օլիմպիական չեմպիոնի անունը կրող գավաթի խաղարկությունը: Մրցմանը մասնակցում էին Հայաստանի, Իրանի եւ Սիրիայի մարմնամարզիկներ: Հայաստանի ներկայացուցիչները սիրիացի եւ իրանցի մարզիկներին մի շանս չտվեցին չեմպիոնական պայքարում:
Ազատ վարժություններում առաջատարը Եվրոպայի փոխչեմպիոն, օլիմպիական Արթուր Դավթյանն էր, իսկ նժույգի վարժությունում հավասարը չուներ Եվրոպայի չեմպիոն, օլիմպիական Հարություն Մերդինյանը: Օղակների վարժությունում 15,7 միավորով ոսկե մեդալակիր դարձավ Եվրոպայի փոխչեմպիոն Վահագն Դավթյանը, իսկ հենացատկի, զուգափայտի եւ պտտաձողի վարժություններում դարձյալ հաղթեց Արթուր Դաթյանը:
Սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը NEWS.am Sport-ի թղթակցի հետ զրույցում ամփոփեց գավաթի խաղարկությունը:
«Ալբերտ Ազարյանի անվան մրցաշարն անցկացվում է արդեն 10-րդ անգամ: Մրցաշարին մասնակցում էին մեր առաջատար մարզիկները, այդ թվում՝ օլիմպիականներ Հարություն Մերդինյանն ու Արթուր Դավթյանը: Հնարավորություն ենք տվել մրցաշարին մասնակցել նաեւ երիտասարդներին ու պատանիներին, որպեսզի նրանք ուժերը փորձեն մեծահասակների հետ: Սա մեզ համար եւս հնարավորություն է տեսնելու եւ հասկանալու, թե ինչ փոխարինող սերունդ ունենք, ինչ հնարավորություններ ունեն մեր երիտասարդներն ու պատանիները:
Ինչ վերաբերում է օլիմպիականներին, այս մրցաշարը նրանց համար հավասարազոր է գլխավոր փորձի, նրանք կոնկրետ այս մրցաշարի համար հատուկ չեն նախապատրաստվել: Այս պահին մեր մարզիկները հանգստանում են: Եվրոպայի առաջնությունից հետո նրանց ուղղակի անհրաժեշտ էր տեւական հանգիստ՝ ծանրաբեռնված մարզումներից ու մրցումներից հետո: Հաջորդ շաբաթվանից կմեկնարկի Օլիմպիական խաղերի նախապատրաստական փուլը՝ հատուկ ու ծանրաբեռնված ծրագրով:
Մեր առաջատար մարզիկները չէին կարող բաց թողնել Ալբերտ Ազարյանի անվան մրցաշարը: Գեղեցիկ չէր լինի, որ Օլիմպիական խաղերի պատճառով մեր եռակի օլիմպիական չեմպիոնի անվան մրցաշարին Հայաստանի ուժեղագույն մարմնամարզիկները չմասնակցեին»,- ասաց Հակոբ Սերոբյանը:
Լուսինե Շահբազյան
Լուսանկարներն՝ Էմմա Ասատրյանի
Հետևեք NEWS.am SPORT-ին Facebook-ում, Twitter և Telegram-ում
22:35 , 23 ապրիլի 
22:11 , 23 ապրիլի 
21:39 , 23 ապրիլի 
20:56 , 23 ապրիլի 
20:33 , 23 ապրիլի 
20:02 , 23 ապրիլի 
19:23 , 23 ապրիլի 
19:03 , 23 ապրիլի 
18:50 , 23 ապրիլի 
17:58 , 23 ապրիլի 
