Հավատում եմ, որ Տիգրան Մարտիրոսյանի եւ Անդրանիկ Կարապետյանի միջեւ առավել հետաքրքիր չեմպիոնական պայքար կլինի նաեւ Ռիոյի Օլիմպիական խաղերում:
Այս մասին NEWS.am Sport-ի թղթակցի հետ զրույցում Նորվեգիայից ասաց ծանրամարտի տղամարդկանց Հայաստանի հավաքականի գլխավոր մարզիչ Փաշիկ Ալավերդյանը, մեկնաբանելով Եվրոպայի առաջնությունում հայ ծանրորդների մրցելույթները:
77 կգ քաշայինների պայքարում Անդրանիկ Կարապետյանը հռչակվեց Եվրոպայի չեմպիոն երկամարտի 367 կգ արդյունքով, իսկ Տիգրան Մարտիրոսյանը՝ Եվրոպայի փոխչեմպիոն՝ երկամարտի 352 կգ արդյունքով:
Պարոն Ալավերդյան, NEWS.am Sport-ը շնորհավորում է Հայաստանի հավաքականում Եվրոպայի նորընծա չեմպիոն եւ փոխչեմպիոն ունենալու կապակցությամբ:
Շնորհակալ եմ: Ես շատ գոհ եմ եւ ուրախ մեր տղաների այսօրվա փայլուն մրցելույթների համար: Մեկնաբանելու ոչինչ չկա, այս քաշային կարգում մենք ուժեղագույնն ենք եւ դա ապացուցեցինք: Մեր թիմում հիմնական հարվածային ուժը այս քաշային կարգն էր՝ 77 կգ: Այն, ինչ սպասում էի տղաներից, արեցին: Չեմ կարծում, որ մյուս քաշային կարգերում տղաները ձեռնունայն կմնան, վստահ եմ, որ լավ կաշխատեն եւ ամեն ինչ կանեն, որ մեդալներ նվաճեն: Աշխարհի առաջնությունում այս քաշային կարգում երրորդ տեղն էր մերը: Եվրոպայում խնդիր չեղավ ապացուցելու, որ առաջին եւ երկրորդ տեղերն են մերն են: Այնքան ուժեղ գտնվեցին մեր ծանրորդները, որ պայքարը նրանց միչեւ գնաց, ինչի համար ես անչափ ուրախ եմ:
77 կգ քաշային կարգում հետաքրքրիր պայքար է Անդրանիկ Կարապետյանի եւ Տիգրան Մարտիրոսյանի միջեւ: Հնարավո՞ր է այս նույն պայքարը կրկնվի Ռիոյի Օլիմպիական խաղերում:
Իհարկե, ես հավատում եմ դրան: Առավել հետաքրքիր պայքար կլինի Օլիմպիական խաղերում: Այս երկու մարզիկները մեկը մյուսին չեն զիջում ուժով: Այնպես չէ, որ այս անգամ մեկը հաղթեց, ուրեմն այն մյուսը թույլ էր: Նրանց միջեւ պայքարը միշտ լինելու է: Հավասարազոր մարզիկներ են, մեր չեմպիոններն են:
Իսկ Օլիմպիական խաղերի համար Եվրոպայի առաջնությունում բարձրացրած կիլոգրամները բավարա՞ր են, թե՞ դեռ ավելացնելու տեղ ունեք:
Այս կիլոգրամները բավական են: Լոնդոնի Օլիմպիական խաղերում պոկում վարժությունում հաղթեցին 168 կգ-ով, իսկ Եվրոպայի առաջնությունում 170 կգ պոկեցին:
Տիգրան Մարտիրոսյանին հաջողվեց հրում վարժության միայն առաջին մոտեցում կատարել, ի՞նչն էր պատճառը:
Առաջին մոտեցմանը բարձրացրեց 192 կգ: Երկրորդ եւ երրորդ մոտեցումներին ծանրաձողի կիլոգրամը 197 էր: Երկրորդ մոտեցումը ձախողեց, իսկ երրորդը կբարձրացներ, եթե արմունկները չդիպչեին ծնկներին: Նա էլ հասկացավ, որ դա չեն հաշվի, բայց այդ զանգն էլ եղավ, որ իջեցնի, ուղղակի աղմուկի մեջ նա չլսեց զանգի ձայնը: Բայց նա կբարձրացներ, նա պատրաստ էր եւ կարող էր: Սա տեխնիկական սխալ էր:
Իսկ Տիգրանը չի՞ տխրել ոսկե մեդալը ձեռքից բաց թողնելու համար:
Ոչ, ինչու պիտի տխրի: Նա հասկանում է եւ գիտակցում, որ ինքն ուժեղ է եւ իր հետ հավասար ուժեղ է նաեւ Անդրանիկ Կարապետյանը: Սա առաջին անգամը չէ, Տիգրանը դեռ շատ մեդալներ կնվաճի, նա հզոր ծանրամարտիկ է:
Անդրանիկ Կարապետյանի հաջողությանը հավատու՞մ էիք:
Առանց հավատի մարդ կապրի՞: Միանշանակ հավատում էի եւ վստահ էի, որ նա կդառնա Եվրոպայի չեմպիոն: Նա, կամ Տիգրան Մարտիրոսյանը:
Մինչեւ հիմա մասնակցած ծանրորդների մրցելույթների մասին ի՞նչ կասեք:
Նրանցից էլ եմ գոհ: Բոլորն էլ լավ հանդես եկան, մասնավորապես Առաքել Միրզոյանը. լավ արդյունք արեց: Ռուսաստանի նախագահի գավաթի խաղարկությունից հետո նա լավ հանդես եկավ, կիլոգրամներն ավելացրեց: Վանիկ Ավետիսյանից էլ եմ գոհ: Նա բոլոր հնարավորություններն ուներ մեդալի համար պայքարելու, բայց տեխնիկական խնդիր եղավ: Եթե մրցավարները մի փոքր բարեխիղճ գտնվեին, հաշվեին հրում վարժությունում նրա բարձրացրած 181 կգ-ը, Վանիկ Ավետսիյանը միանշանակ մեդալ կնվաճեր:
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում