Արթուր Ալեքսանյանը դարձյալ եզրափակիչում պարտվեց Նիկիտա Մելնիկովին

Աշխարհի կրկնակի չեմպիոն Արթուր Ալեքսանյանը չկարողացավ չորրորդ անգամ դառնալ հունահռոմեական ոճի ըմբշամարտի Եվրոպայի չեմպիոն ու կրկնել 2012, 2013 եւ 2014 թվականների հաջողությունը:

Լատվիայի մայրաքաղաք Ռիգայում ընթացող Եվրոպայի առաջնության 98 կգ քաշային կարգի եզրափակիչում Լոնդոնի Օլիմպիական խաղերի բրոնզե մեդալակիրը 0:4 հաշվով պարտվեց ռուս Նիկիտա Մելնիկովին, որը երրորդ անգամ անընդմեջ եզրափակիչում հաղթեց գյումրեցի ըմբիշին:

Ալեքսանյանն ավելի ակտիվ սկսեց գոտեմարտը եւ սկզբնամասում ռուս ըմբիշը նկատողություն ստացավ պասիվության համար: Սակայն քիչ անց Ալեքսանյանը 2 անգամ պասիվություն ստացավ եւ հայտնվեց պարտերում, իսկ Մելնիկովը կատարեց 4 միավորանոց հնարք: Նա առաջին մրցափուլում հաղթեց 4:0 հաշվով, իսկ երկրորդում պահպանեց առավելությունը: Արթուր Ալեքսանյանը շատ ավելի ակտիվ էր երկրորդ մրցափուլում, բայց Մելնիկովին պասիվություն այդպես էլ չգրանցվեց:

2013 թվականին Արթուր Ալեքսանյանը 28-ամյա Նիկիտա Մելնիկովին 2 անգամ պարտվել էր Բուդապեշտում անցկացված աշխարհի առաջնության եզրափակիչում ու Կազանում կայացած 27-րդ համաշխարհային ուսանողական խաղերի եզրափակիչում: Գյումրեցի ըմբիշը չէր պարտվել նախորդ 45 գոտեմարտերում անընդմեջ:

Ռիգայում 24-ամյա Ալեքսանյանը պայքարը սկսել էր 1/8 եզրափակիչից՝ 8:0 հաշվով հաղթելով ուկրաինացի Դմիտրի Տիմչենկոյին: Քառորդ եզրափակիչում նա 6:2 հաշվով պարտության էր մատնել ավստրիացի Դանիել Գաստլին, իսկ կիսաեզրափակիչում ուժեղ էր գտնվել թուրք Ջենկ Իլդեմից՝ 6:2:

Արթուր Ալեքսանյանը Եվրոպայի փոխչեմպիոն դարձել էր նաեւ 2011-ին:

Մարտի 12-ին Եվրոպայի առաջնության արծաթե մեդալ նվաճել էր նաեւ 32-ամյա Ռոման Ամոյանը, որը 59 կգ քաշային կարգի եզրափակիչում ժամանակից շուտ 0:8 հաշվով պարտվեց ռուսաստանցի Մինգիյան Սեմյոնովին եւ չորրորդ անգամ դարձավ մայրցամաքի փոխչեմպիոն:

Եվրոպայի առաջնության առաջին օրը Հայաստանի ներկայացուցիչներից պայքարի մեջ էին մտել նաեւ Միհրան Հարությունյանը (66 կգ) եւ Էդգար Խաչատրյանը (130 կգ), որոնք մեդալ չէին նվաճել:

Բաքվում կայացած Եվրոպական խաղերի փոխչեմպիոն Միհրան Հարությունյանը պայքարը սկսել էր որակավորման փուլից, որտեղ 6:4 հաշվով ուժեղ էր գտնվել լեհ Գժեգոժ Վանկեից, սակայն 1/8 եզրափակիչում հայ ըմբիշը պարտվել էր լատվիացի Նիկիտա Մասյուկսին: Լատվիացի ըմբիշը հասավ մինչեւ կիսաեզրափակիչ, որտեղ պարտություն կրեց, եւ Միհրան Հարությունյանը զրկվեց բրոնզե մեդալի համար պայքարելու հնարավորությունից:

Գերծանրքաշային Էդգար Խաչատրյանը որակավորման փուլում 9:0 հաշվով հաղթել էր ավստրիացի Լուկաս Հոերմանին, իսկ 1/8 եզրափակիչում պարտվել էր գերմանացի Էդուարդ Պոպին՝ 0:6: Գերմանացին էլ իր հերթին պարտություն է կրել հաջորդ գոտեմարտում:

Եվրոպայի առաջնության վերջին օրը՝ մարտի 13-ին, Հայաստանի հավաքականի կազմում հանդես կգան նաեւ Վարշամ Բորանյանը (71 կգ), Կարապետ Չալյանը (75 կգ), Ռաֆայել Մանուկյանը (80 կգ) եւ Մաքսիմ Մանուկյանը (85 կգ):

Հետևեք NEWS.am SPORT-ին Facebook-ում, Twitter և Telegram-ում