Հույս ունեմ, որ Տիգրան Պետրոսյանի հուշամրցաշարը կդառնա ավանդական եւ ես էլ կնվաճեմ հաղթողի կոչումը, ասել է հայկական շախմատի առաջատար Լեւոն Արոնյանը Մոսկվայում ավարտված մրցաշարից հետո NEWS.am Sport-ի թղթակցի հետ զրույցում:
7-րդ տուրում Լեւոն Արոնյանը սեւերով հաղթեց ռուսաստանցի Էռնեստո Ինարկիեւին եւ վաստակեց 4 միավոր՝ Բորիս Գելֆանդի հետ կիսելով 3-4-րդ տեղերը: Լրացուցիչ ցուցանիշներով Լեւոն Արոնյանը զբաղեցրեց 4-րդ տեղը:
Լեւոն, մրցաշարի 7 տուրերից 6-ում շարունակ ոչ-ոքիներ էիք գրանցում եւ միայն վերջին տուրում կարողացաք հաղթել: Բա՞րդ մրցակիցներն էին:
Դե հույս ունեի, որ ավելի շատ միավոր կվաստակեի, բայց այնպես ստացվեց, որ մրցակիցներս շատ համառ էին եւ լավ էին պաշտպանվում:
Մրցաշարում հետաքրքիր էր խաղալը, ուրախ եմ, որ մասնակցեցի: Այն շատ լավ էր կազմակերպված: Հուսով եմ, որ այս մրցաշարը ավանդական կդառնա եւ այսպիսի գեղեցիկ մրցանակ մի անգամ էլ ես կնվաճեմ:
Ո՞ր պարտիան էր ամենադժվարը:
Երեկվա պարտիան Գրիշչուկի հետ եւ՛ ամենաբարդն էր, եւ՛ ամենահետաքրքիրը: Ափսոս, որ չկարողացա առավելության հասնել նրա նկատմամբ:
Այս օրերին շախմատի աշխարհի չեմպիոնի թագը վիճարկում են Անանդն ու Կարլսենը: Մեկնարկից առաջ Ձեր նախապատվությունը տվել էիք նորվեգացի գրոսմայստերին, իսկ այսօր նա պարտվեց: Ի՞նչ կասեք այդ մասին:
Այո, ասել եմ, որ երեւի Անանդը կպարտվի, քանի որ նրա համար շատ բարդ է խաղալ Կարլսենի հետ, բայց այսօր Կարլսենը պարտվեց: Այսօրվա խաղը շատ կարեւոր էր, հնարավոր է՝ այս պարտությունից հետո շատ դժվար լինի Կարլսենի համար: Նա վաղուց Անանդին չէր պարտվել: Սա կարող է նրա վրա հոգեբանորեն ազդել:
Կարծում եք, որ պարտությունից հետո բա՞րդ է հոգեբանորեն տրամադրվել: Դուք, օրինակ, ինչպե՞ս եք վարվում այդ դեպքերում:
Դա կախված է խաղացողից: Կան շախմատիստներ, որ պարտությունից հետո չեն կարողանում խաղալ եւ ուժը ցուցադրել: Ինձ մոտ այդպես չէ: Պարտությունից հետո ես ներսս կոփում եմ, ասում եմ, որ այդպես չի կարելի: Դե, համենայնդեպս, վերջին երկու մրցաշարերում չեմ պարտվել (ծիծաղում է):
Շուշանիկ Հակոբյան (Մոսկվա)
Հետևեք NEWS.am SPORT-ին Facebook-ում, Twitter և Telegram-ում