Ես շատ եմ ցանկանում հանդես գալ Հայաստանի ազգային հավաքականում: Դա մեծ պատիվ կլիներ ընտանիքիս եւ ինձ համար: Այդ մասին NEWS.am Sport-ի թղթակցի հետ զրույցում ասաց ուրուգվայահայ ֆուտբոլիստ, Ուրուգվայի «Աթենաս» ակումբի 26-ամյա կիսապաշտպան Կարլոս Քեոսեյանը՝ հանրահայտ մարզիչ Մանուել Քեոսեյանի որդին:
Մանուել Քեոսեյանը համարվում է Հարավային Ամերիկայի լավագույն մարզիչներից մեկը: «Սպորտինգ Դեֆենսորի» եւ «Բելա Վիստա» թիմերի հետ դարձել է Ուրուգվայի չեմպիոն: Մարզել է Ուրուգվայի, Հոնդուրասի եւ Հունաստանի ակումբային թիմեր: Որպես ֆուտբոլիստ հանդես է եկել արգենտինական «Ինդեպենդիենտեում» եւ «Դեպորտիվո Արմենիոյում»:
Կարլոս, որտեղի՞ց է ընտանիքդ:
Ծնողներս Մանուել եւ Գրացիելա Քեոսեյաններն են: Ունեմ երկու քույր ՝ Կարինան եւ Կամիլան: Պապս Հայաստանից եկել է Ուրուգվայ 1929-ին: Ցավոք, ես նրան չեմ տեսել, բայց ասում են, որ յուրահատուկ անձնավորություն էր:
Ե՞րբ սկսեցիր զբաղվել ֆուտբոլով:
5 տարեկանից զբաղվում եմ ֆուտբոլով: Մարզվել եմ ֆուտբոլի խմբակներում: Անցել եմ «Դեֆոնսոր Սպորտինգի» բոլոր տարիքային խմբերով: Խաղացել եմ Ուրուգվայի «Ռասինգի» եւ «Աթենասի» կազմերում, նաեւ արգենտինական «Տեմպերլեյ» ու «Անտոնիանա» թիմերում:
Հայրդ հատնի մարզիչ Մանուել Քեոսայանն է: Չէի՞ր ցանկանա խաղալ նրա մոտ:
Հայրս ունի ֆուտբոլային մարզիչի մեծ փորձ: Աշխատել է տարբեր թիմերի հետ: Մեկ անգամ ես նրա մոտ փորձաշրջան էի անցնում Հոնդուրասում, բայց գործը պայմանագրին չհասավ: Շատ կցանկանայի աշխատել նրա ղեկավարությամբ:
Հայաստանի հետ կապ պահո՞ւմ ես:
Մի քանի անգամ ինձ հետ կապվել են Հայաստանից, հարցրել՝ կուզենամ խաղալ այդտեղ, բայց ոչ մի հստակ բան չի եղել:
Ի՞նչ կարծիք ունես Ուրուգվայի առաջնության մասին:
Ֆուտբոլն այստեղ շատ մրցունակ է: Ես կարողացել եմ թիմիս հետ դուրս գալ Բարձրագույն լիգա: Մեր թիմը շատ երիտասարդ է: Ես ամենափորձառու եւ հայտնի խաղացողներից եմ:
Փորձեր ձեռնարկո՞ւմ ես տեղափոխվել Եվրոպա:
Շատ լավ կլիներ հանդես գալ Եվրոպայում: Այնտեղ ամենալավ տեղն է ֆուտբոլի համար: Դա ինձ համար երազանք է:
Ծանո՞թ ես ուրուգվայահայ ֆուտբոլիստ Մաուրո Գեւգեոզյանի հետ:
Լսել եմ նրա մասին, բայց բախտ չի վիճակվել ծանոթանալ:
Ցանկանո՞ւմ ես հանդես գալ Հայաստանի ազգային հավաքականում:
Ես շատ եմ ցանկանում հանդես գալ Հայաստանի ազգային հավաքականում: Դա մեծ պատիվ կլիներ ընտանիքիս եւ ինձ համար: Հուսամ՝ այն մի օր կիրականանա:
Հետեւո՞ւմ ես հայկական ֆուտբոլին:
Հայկական ֆուտբոլը շատ է առաջադիմում: Հայ ֆուտբոլիստներից ոմանք հանդես են գալիս Եվոպայում եւ փորձում են առաջ գնալ:
Վերա Մարտիրոսյան
Հետևեք NEWS.am SPORT-ին Facebook-ում, Twitter և Telegram-ում