11:40  ,  3 ապրիլի, 2013

ՀՖՖ նախագահի պատասխանը ֆուտբոլային գործակալ Դմիտրի Սելյուկին

Հայաստանի ֆուտբոլի ֆեդերացիայի նախագահ Ռուբեն Հայրապետյանը ՀՖՖ մամուլի ծառայության խնդրանքով մեկնաբանել է ֆուտբոլային գործակալ Դմիտրի Սելյուկի՝ իրեն հասցեագրված դիմումը, որը նա հնչեցրել էր  NEWS.am Sport-ի թղթակցին տված հարցազրույցի ժամանակ:

«Բազմիցս հայտարարել եմ, որ հանուն հայկական ֆուտբոլի զարգացման պատրաստ եմ համագործակցել ցանկացած անձի կամ կազմակերպության հետ, ովքեր ցանկանում են եւ կարող են իրենց նպաստը բերել այդ գործին: Սակայն, այս պարագայում  ի՞նչ համարձակությամբ է նա համագործակցության դիմում հղում ինձ, երբ միեւնույն ժամանակ փորձում է քննադատել մարդու, ով արել եւ անում է ամեն ինչ հայկական ֆուտբոլի զարգացման համար եւ ում համար հայկական ֆուտբոլի հաջողությունը վեր է ցանկացած անձնական խնդիրներից: Կամ առնվազն կույր պետք է լինել սա չնկատելու համար, կամ ֆուտբոլային իրականությունից անտեղյակ՝ այդ չիմանալու համար, կամ էլ՝ ... դատեք ինքներդ ...: Ինչպե՞ս կարող է մարդ, ով իր միջոցները հայթայթում է ֆուտբոլում, հաճախ նաեւ ֆուտբոլիստների հաշվին՝ քննադատել մարդկանց, ովքեր իրենց անձնական միջոցներն են ներդնում նույն ֆուտբոլի զարգացման համար եւ ոչինչ չեն խնայում հենց նույն ֆուտբոլիստների  անձնական բարօրության համար:  Խոսքս հայտնի գործարարներ Օլեգ Մկրտչյանի եւ Սուլեյման Կերիմովի մասին է, որոնցից առաջինը  անուրանալի ներդրում ունի ուկրաինական, ռուսական եւ հայկական ֆուտբոլի զարգացման գործում, իսկ  Սուլեյման Կերիմովը ջանք չի խնայում դաղստանյան ֆուտբոլը զարգացնելու համար՝ դրանով իսկ նպաստելով ռուսական ֆուտբոլի որակական նոր մակարդակի բարձրացմանը : Եվ վերջապես, ինչպե՞ս կարող է մարդ, ով մեկ հայտարարում է թե Հենրիխ Մխիթարյանի գործակալն է՝ երբեք չլինելով նման դերում, մեկ էլ հայտարարում է թե ինքն է տեղափոխել Արազ Օզբիլիսին «Կուբան»՝ երբ անձամբ եմ խնդրել Օլեգ Մկրտչյանին գնել Արազի տրանսֆերը եւ անձամբ խոսել Արազի հետ եւ հորդորել, որ նա տեղափոխվի «Կուբան», համագործակցության կոչ հղել ինձ:

Չի՛ կարող ուղղակի նման վարք դրսեւորող անձն անգամ շփվել իմ հետ, ուր մնաց՝ համագործակցել:

Այդ իսկ պատճառով կխնդրեի Սելյուկին հեռու մնալ հայկական ֆուտբոլից եւ իր իսկ կոչած «պատերազմներից» զերծ պահել հայ ֆուտբոլիստներին, նրանք շատ ավելի կարեւոր գործ ունեն՝ ֆուտբոլը»,- ասել է ՀՖՖ նախագահը:

Ֆոտո՝ NEWS.am Sport

Հետևեք NEWS.am SPORT-ին Facebook-ում, Twitter և Telegram-ում