ԱԱ. Գեւորգ Ղարիբյանը օլիմպիական ուղեգիր չնվաճեց

Սերբիայի մայրաքաղաք Բելգրադում ավարտվող հունահռոմեական ոճի ըմբշամարտի աշխարհի առաջնությունում երրորդ մրցումային օրվա ավարտին տեղի ունեցավ բրոնզե մեդալի գոտեմարտերում պարտված ըմբիշների պայքարը Փարիզի Օլիմպիական խաղերի ուղեգրի համար:

 Հայաստանի ներկայացուցիչ Գեւորգ Ղարիբյանը (60 կգ) օլիմպիական ուղեգրի համար գոտեմարտում մրցեց Իրանի ներկայացուցիչ Մեհդի Մոհսեն Նեջադի հետ եւ պարտվեց 0:7 հաշվով: 60 կգ քաշային կարգի 5-րդ ուղեգիրը նվաճեց իրանցի ըմբիշը: 

2020 թվականի Եվրոպայի չեմպիոնը Բելգրադի մրցագորգում երեք հաղթանակ տանելուց հետո (9:0, 3:1, 1:1), կիսաեզրափակիչում պարտվել էր օլիմպիական փոխչեմպիոն, աշխարհի եւ Ասիայի կրկնակի չեմպիոն Ճապոնիան ներկայացնող Կյենիչիրո Ֆումիտային(1:5): Բրոնզե մեդալի համար գոտեմարտում էլ վերջին երեք վայրկյանում պարտվել էր Չինաստանի ներկայացուցիչ Լիգուո Չաոյին:

Հիշեցնենք, որ Բելգրադում անցկացվող աշխարհի առաջնությունը ըմբիշների առաջին օլիմպիական վարկանիշային մրցաշարն էր: Հայաստանի հավաքականից Փարիզի Օլիմպիական խաղերի ուղեգրեր նվաճեցին Արթուր Ալեքսանյանը եւ Մալխաս Ամոյանը:  Հունահռոմեակ ոճի ըմբշամարտի օլիմպիական քաշային կարգերն են` 60 կգ, 67 կգ, 77 կգ, 87 կգ, 97 կգ եւ 130 կգ:

Արմեն Բաբալարյանի գլխավորած հավաքականն արդեն նվաճել է երկու մեդալ: Արթուր Ալեքսանյանը ծանր գոտեմարտում բավարարվեց արծաթե մեդալով, Մալխաս Ամոյանը  բրոնզե մեդալակիր է: 

Հայաստանի հավաքականից պայքարի մեջ մնացին Սլավիկ Գալստյանը եւ Հրաչյա Պողոսյանը:

Սլավիկ Գալստյանը սեպտեմբերի 24-ին բրոնզե մեդալի համար գոտեմարտ կանցկացնի եւ կպայքարի նաեւ օլիմպիական ուղեգրի համար, Եվրոպայի բրոնզե մեդալակիր Հրաչյա Պողոսյանը բրոնզե մեդալի համար սփոփիչ գոտեմարտեր կանցկացնի:

Հետևեք NEWS.am SPORT-ին Facebook-ում, Twitter և Telegram-ում