16:03  ,  21 սեպտեմբերի, 2023

ԱԱ. Մալխաս Ամոյանը տպավորիչ հաղթանակով դուրս եկավ քառորդ եզրափակիչ

Սերբիայի մայրաքաղաք Բելգրադում անցկացվող հունահռոմեական ոճի ըմբշամարտի Աշխարհի չեմպիոն, Եվրոպայի կրկնակի չեմպիոն Մալխաս Ամոյանը երկրորդ հաղթանակը տարավ եւ պայքարը կշարունակի քառորդ եզրափակիչում:

77 կգ քաշային կարգի 1/8 եզրափակիչում Հայաստանի ներկայացուցիչը մրցեց Ֆրանսիայի ներկայացուցիչ Ջոնի Բարի հետ եւ ժամանակից շուտ տպավորիչ հաղթանակ տարավ 9:1 հաշվով: 

Մալխաս Ամոյանը պայքարը սկսել է 1/16 եզրափակիչիչ, որտեղ կրկին ժամանակից շուտ 9:0 հաշվով պարտության է մատնել Լիտվայի ներկայացուցիչ Պաուլիուս Գալկինասին:

Աշխարհի առաջնությունում առաջին մրցումային օրը պայքարի մեջ մտած Ռուդիկ Մկրտչյանը պարտվեց:

Եվրոպայի բրոնզե մեդալակիրը (55 կգ) մեկնարկային 1/8 եզրափակիչում 0:8 հաշվով զիջեց Թուրքիայի ներկայացուցիչ Ադեմ Բուրակ Ուզունին:

Հայաստանի մյուս ներկայացուցիչները եւս պարտվել են:

Հայաստանի ներկայացուցիչ Դավիթ Օվասապյանը (130 կգ) չկարողացավ հաղթահարել 1/8 եզրափակիչի արգելքը:

Աշխարհի Մ23 փոխչեմպիոնը ուժերը կչափեց աշխարհի փոխչեմպիոն, Պանամերիկյան խաղերի հնգակի չեմպիոն, կուբացի Օսկան Պինո Հինդսի հետ եւ պարտվեց 1:4 հաշվով:

Մեկնարկում Օվասապյանը 40 վայրկյանում հաղթել էր հնդիկ ըմբիշ Սայն Մեհարին:

Աշխարհի եւ Եվրոպայի չեմպիոն Մաքսիմ Մանուկյանը պարտվել է որակավորման փուլում: Նրան հաղթած գերմանացի ըմբիշը եւս պարտվեց: Մաքսիմ Մանուկյանը լքեց պայքարը:

Հետևեք NEWS.am SPORT-ին Facebook-ում, Twitter և Telegram-ում