15:04  ,  8 փետրվարի, 2023

Իսրայել Հակոբկոխյան․ ՀԲՖ նախագահին հրավիրում եմ մենամարտի, եթե ինձ ասելիք ունի՝ թող գա (ֆոտո, վիդեո)

Հայաստանի բռնցքամարտի ֆեդերացիայի նախագահ Հովհաննես Հովսեփյանին հրավիրում եմ հանդիպման՝ ռինգում, մենամարտի: Եթե նա ինձ ասելիք ունի, թող գա մենամարտի:

Այս մասին լրագրողների հետ զրույցում ասաց բռնցքամարտի աշխարհի չեմպիոն, Եվրոպայի եռակի չեմպիոն Իսրայել Հակոբկոխյանը:

Երեւանում անցկացված բռնցքմարտի Հայաստանի առաջնության մեկնարկի օրը լեգենդար բռնցքամարտիկը բողոքի ակցիա էր արել ընդդեմ Հայաստանի բռնցքամարտի ֆեդերացիայի: Հակոբկոխյանի որդուն թույլ չէին տվել մասնակցել Հայաստանի առաջնությանը այլ ֆեդերացիայի անունից միջազգային մրցաշարի մասնակցելու պատճառով:

«Օրերս ֆեդերացիայի էջում մի հոդված հրապարակվեց, որտեղ ֆեդերացիաի նախագահն իմ հասցեին անհարգի արտահայտություններ է արել: Այս ասուլիսը չէի հրավիրի, եթե չլիներ այդ հոդվածում հետեւալ միտքը, թե՝ ով է Իսրայելը, ով է՝ ինքը: Եկել եմ պատասխանելու, թե ով եմ ես:  Ինձ բռնցքամարտի ամբողջ աշխարհն է ճանաչում: Աշխարհում չկա մի ռինգ, որտեղ մտած չլինեմ, որը տեսած չլինեմ: Ամբողջ Սովետական Միությունում ես եղել եմ համար առաջին բռնցքամարտիկների շարքում: Այսօր ֆեդերացիան գլխավորող անձնավորությունը բռնցքամարտում ոչ անցյալ է ունեցել, ոչ էլ ապագա է ունենալու: Ներկայով էլ գլուխ գովալ չի կարելի, որովհետեւ այսօրվա իրականությունը ցավալի է: Եթե մի բան սկիզբ ունի, ավարտ էլ ունի: Հնարավոր չէ, որ այսպիսի թափթփուկներ հետագայում ապագա ունենան:

Թող իմանան՝ ով եմ ես, ով են իրենք բռնցքամարտի աշխարհում: Բռնցքամարտում 3 տեսակ հարված կա եւ շուրջ 15 կոմբինացիա: Եթե Հայաստանում կլինի մեկ մարզիկ, մարզիչ, գործող, ավարտած բռնցքամարտիկ, որը կկարողանա այդ տերմիններն իմ կեսի չափ ցույց տալ, ես բռնցքամարտից կհեռանամ եւ մարզաձեւի անունը չեմ տա: Այս կապիկները որոշել են, որ կարող են Իսրայել Հակոբկոխյանի մասին իրականությանը չհամապատասխանող բաներ խոսել:

Իմ որդին նախորդ տարի զբաղեցրեց 2-րդ տեղը, չնայած հաղթանակը նրանն էր: Ասացի՝ լավ: Ստացվում է, որ հավաքականում նա պետք է լինի երկրորդ համարը, բայց նրան չընդգրկեցին ոչ հավաքական, որ հավաքների տարան, ոչ մրցաշարերի: Ես անձամբ եմ դիմել ֆեդերացիայի նախագահին եւ հավաքականի գլխավոր մարզիչին, թե ինչու չեն տանում մրցաշար: Ասել են՝  հաջորդին կտանենք. այդպես ամեն անգամ: Նույնիսկ, առաջարկել եմ իմ գումարներով ընգրկել կազմ, եթե ֆինանսավորման խնդիր կա: Ասել են՝ ոչ: Ես ինքս եմ տեղեկացել, որ հավաք են անցնում, զանգել եմ հավաքականի մարզիչին, որը ինչպես ֆեդերացիայի նախագահը, բռնցքամարտի հետ կապ չունի: Նրա կողմից մարզումներին միանալու առաջարկ չի եղել: Նա ասում է առաջարկել է, բայց այդպիսի բան չի եղել: 

Իմ տղան հավաքականի կազմում մասնակցել է միայն մինչեւ 22 տարեկանների Եվրոպայի առաջնությանը: Առաջին մենամարտից պարտվեց կողմնակալ մրցավարության արդյունքում: Բոլորն էլ տեսան, ով հասկանում է բռնցքամարտից՝ կփաստի, որ ռինգի մրցավարն ու կողային մրցավարներն ամեն ինչ արեցին, որ իմ տղան պարտվի: Ես իմ կյանքում չէի տեսել, որ մենամարտի առաջին րոպեից տվյալ անկյան մարզիկին նկատողություն տան: Այդ մենամարտից հետո բարկացած դուրս եկա եւ ինքս ինձ բարձրաձայն քննարկում էի, թե ինչպես սխալ մրցավարության արդյունքում որդուս հաղթանակը ձեռքից առան: Մի քանի մետր այն կողմ երեք ադրբեջանցիներ էին կանգնած, որոնք իրենց հավաքականի մարզիչներից էին, լսել էին, թե ինչպես էի վրդովված խոսում պարտությունից հետո: Մոտեցան, ասացին՝ բողոքարկեք, բայցահայտ կողմնակալ մրցավարություն էր: Ես հասարակ մարզիչ եմ, իրավունք չունեմ, բողոքարկեմ, պետք է ֆեդերացիայի նախագահը բողոքարկի, որը նստած հետեւում էր: Հետիս մարզիչին ասացի՝ գնա ասա, թող բողոքարկի, եթե ցավում է հայկական բռնցքամարտի համար: Նա չբողոքարկեց, իմ տղան դուրս մնաց պայքարից: Հետո կանգնեցին ասացին, թե Իսրայել Հակոբկոխյանն իրեն լավ չպահեց Եվրոպայի առաջնությունում, իմ վարքագծից խոսեցին:

Մենք Հայաստանի պրոֆեսիոնալ բռնցքամարտի համահայկական ֆեդերացիայի հետ մասնակցեցինք մի քանի մրցաշարերի: Ֆեդերացիայի նախագահը Գառնիկ Հարությունյանն է, որը WBC-ի հետ պայմանագիր ունի եւ իրավունք ունի թիմ ներկայացնել միջազգային մրցաշարերի: Մենք մրցաշարերի մասնակցեցինք Լեհաստանում, նաեւ Մեքսիկայում ունեցանք մեկ 4-ռաունդանոց պրոֆեսիոնալ մենամարտ: Շատ շնորհակալ եմ Գառնիկ Հարությունյանին, ով իմ տղային տվեց այդ հնարավորությունը եւ ընդգրկեց թիմի կազմ: Հիմա ինձ ասում են, թե ես իրավունք չունեմ այլ ֆեդերացիայի կողմից մասնակցել միջազգային մրցաշարի: Սուտ նամակ են ստեղծել, իբր այն ուղարկել է EUBC-ն եւ արգելում է ազգային ֆեդերացիան չներկայացնող մարզիկներին մասնակցել միջազգային մրցաշարերի: Այդ նամակում, որն իբր ուղարկել է EUBC-ն՝ գրված է, որ դուք ձեր ներքին հարցերը լուծեէ ֆեդերացիայի ներսում եւ կայացրած որոշման մասին մեզ տեղյակ պահեք: Ֆեդերացիան որոշել է, որ պետք է արգելի: Ինձ պայմանագիր էին առաջարկում, ասում էին՝ արի, ստորագրի, որ առանց ֆեդերացիայի իմացության, որեւէ մրցաշարի այդ ֆեդերացիայի կողմից չես մասնակցելու: Ես էլ չգնացի: Նրանք ուզում էին ինձ գերի վերցնել: Ես ինչո՞ւ պետք է ստորագրեմ, իմ տղան պետք է մասնակցի մրցաշարերի, որպեսզի որպես բռնցքամարտիկ աճ ունենա:

Եթե ֆեդերացիայի նախագահը բան ունի ինձ ասելու կամ այս ասուլիսից հետո ինչ-որ բան կարող է ինձ ասել, թող գա ինձ հետ մտնի ռինգ. հրավիրում եմ մենամարտի: Ես տարիքս առած, ծեր մարդ եմ, նա ինձանից 30 տարի երեւի երիտասարդ է, թող ինձ հետ մենամարտի: Նա չի կարող ինձ գերի վերցրել: Նա իր կարճ խելքով որոշել էր, որ ես կգնամ եւ իր պայմանների տակ կստորագրեմ: Նա եկել է ոչ թե հայկական բռնցքամարտը զարգացնի, այլ բռնցքամարտի հաշվին գումար աշխատի: Նա ուզում է բոլոր բռնցքամարտիկներին գերի վերցնել, ինչպես ասի, այդպես անեն:

Հայաստանի առաջնությունն անցկացվում է պետության գումարներով: Որեւէ մեկն իրավունք չուներ իմ որդուն արգելել մասնակցել: Ես դիմել եմ ԿԳՄՍ եւ ՀԱՕԿ, թե ինչպես են արգելում: Նրանց էլ ֆեդերացիան այդ սուտ նամակն է դեմ տվել:

Ժամանակին մենք ունեցել ենք հանճարեղ մարզիչ Արիստակեսյան: Նրա շնորհիվ հայկական դպրոցը միշտ աչքի է ընկել, երեւացել է: Ես հետեւեցի Հայաստանի առաջնությանը: Այնտեղ նորմալ բռնցքամարտ չտեսա: Կարող են «շաշի» բախտով մեկ անգամ հաջողության հասնել: Հիմա հայկական բռնցքամարտում «տուրուդմփոց հիվանդանոց» վիճակ է»,- ասաց Իսրայել Հակոբկոխյանը:

Նշենք, որ Հայաստանի առաջնությունից հետ Հայաստանի բռնցքամարտի ֆեդերացիայի նախագահը  պատասխանել էր Իսրայել Հակոբկոխյանին:

Լուսինե Շահբազյան 

Հետևեք NEWS.am SPORT-ին Facebook-ում, Twitter և Telegram-ում