Ուրախ եմ, որ մեր թիմը կարողացավ հաղթահարել լրացուցիչ լարվածությունը եւ վստահ հաղթանակ տանել Ադրբեջանի նկատմամբ, ինչը շատ կարեւոր էր բոլորիս համար: Ոչ միայն շախմատի, այլեւ մեր երկրի համար շատ հաճելի պահ էր:
Այս մասին NEWS.am Sport-ի թղթակցի հետ զրույցում ասաց գրոսմայստեր, Համաշխարհային օլիմպիադայի կրկնակի չեմպիոն, Հայաստանի հավաքականի նախկին խաղացող Տիգրան Լ. Պետրոսյանը՝ մեկնաբանելով Հնդկաստանի Չենայ քաղաքում ավարտին մոտեցող Համաշխարհային օլիմպիադայում Հայաստանի հավաքականի հաղթանակը Ադրբեջանի նկատմամբ: Նախավերջին տուրում Արման Փաշիկյանի գլխավորած թիմը մրցեց Ադրբեջանի թիմի հետ եւ հաղթեց մեծ առավելությամբ՝ 3:1:
Տիգրան, նախ շնորհավորում եմ բոլորիս 10-րդ տուրում Ադրբեջանի նկատմամբ Հայաստանի հավաքականի հաղթանակի կապակցությամբ: Ինչպե՞ս կգնահատեք տղաների պարտիաները:
Շատ ուրախ եմ, որ տղաները երեկվա պարտությունից հետո իրենց մեջ ուժ գտան եւ հաղթեցին Ադրբեջանի հավաքականին: Հոգեբանական առումով միշտ էլ դժվար է Ադրբեջանի հետ մրցախաղերում: Դժվար էր այս թիմի դեմ խաղալ, գործակիցներով մեզ գերազանցում են, նրանք ունեն Շահրիյար Մամեդյարով, որն աշխարհի ակնհայտ ուժեղագույներից է, մոտ 10 տարի թոփ-10-ի մեջ է:
Մամեդյարովը Գաբրիել Սարգսյանի հետ խաղում էր սպիտակներով: Անկեղծ ասած հենց այդ պարտիայից էի վախենում, որ կարողանանք հաղթել սեւերով, բայց ամենահեշտն այս պարտիան ստացվեց: Սկզբնախաղից դուրս գալուց Մամեդյարովը սխալվեց, մի քանի զինվոր զոհաբերեց, որն իր հետեւանքով բավականին ուժեղ հակախաղ էր ստանում սպիտակ ֆիգուրները: Այս դեպքում ինչ-որ բան լավ չէր հաշվարկել եւ ուղղակի մնաց մի զինվոր պակաս: Հետագայում Գաբրիելը անցավ վերջնախաղ, որտեղ, օգտագործելով մեկ զինվորի առավելությունը, վստահ հաղթանակ տարավ:
Ռոբերտ Հովհաննիսյանը, ինչպես մյուս բոլոր պարտիաներում, այս պարտիայում էլ շատ վստահ խաղաց: Գրեթե առանց կասկածի, ավելացնելով ճնշումն ու առավելությունը, հասավ հաջողության: Կարելի է ասել, Ռոբերտ Հովհաննիսյանի պարտիայի մեկնարկից 1,5 ժամ անց ակնկալվում էր, որ հաղթելու ենք, միայն հայտնի չէր՝ ինչ հաշվով:
Հրանտ Մելքումյանն ուներ փոքր առավելություն, բայց, կարծես, տեսնելով, որ Գաբրիելն ու Ռոբերտը վստահ հաղթում են, պարտիան ավարտեց ոչ ոքի:
Մանուել Պետրոսյանի մոտ դրությունը մի քիչ բարդ էր սկզբից, բայց հետագայում նա նույնպես ուներ առավելություն: Ուղղակի երեւի փորձեց ռիսկի չգնալ եւ ավարտել ոչ ոքի, որպեսզի անակնկալ չլինի եւ հաղթանակ տանենք:
3:1 հաշվով հաղթել Ադրբեջանին շատ լավ արդյունք է, այն էլ Օլիմպիադայի նախավերջին տուրում:
Դեռ կա վերջին խաղ եւ ամեն ինչ առջեւում է: Ուզբեկստանի հավաքականն այսօր ոչ ոքի է խաղացել եւ ուզբեկների հետ կիսում ենք առաջին տեղը:
Այս պահին ոսկե մեդալի ի՞նչ հնարավորություն եք տեսնում:
Պետք է փաստենք, որ Օլիմպիադան շատ հաջող է ստացվել մեզ համար, հաջող ենք հանդես եկել: Անկախ վերջին տուրի արդյունքից, շատ լավ անցկացված մրցաշար էր մեր հավաքականի համար: Ցանկալի կլիներ, որ վերջին խաղը կարողանանք հաղթել: Հաղթելու դեպքում երկրորդ տեղը միանշանակ է եւ անձնական ցուցանիշներով գուցե շանսեր կունենանք նաեւ չեմպիոն դառնալ:
Նույնը չեմ կարող ասել կանանց հավաքականի մասին: Աղջիկները, ցավոք, պարտվեցին Ադրբեջանի հավաքականին: Այս պահին արդեն մեդալի որեւէ հավակնություն չունենք: Կանանց թիմը նույնպես բավականին լավ մրցաշար անցկացրեց: Մրցաշարի ընթացքում գտնվել են բարձր տեղերում: Հուսանք՝ վերջին խաղը հաղթելով, տեղ կգրավենք լավագույն տասնյակում:
Տիգրան, նախորդ տասը տուրերի ընթացքում ո՞րն էր ամենալարվածը:
Շատ են եղել լարված տուրեր: Կային պարտիաներ, որ դժվար էր կանխագուշակել արդյունքը: Մրցաշարից առաջ թվում էր, թե ամենաբարդը լինելու է Ադրբեջանի եւ ԱՄՆ-ի հավաքականների հետ մրցախաղերը, բայց, թերեւս, քիչ թե շատ հեշտ այդ դիմակայությունները ստացվեցին: Շատ էին բարդ ու լարված պարտիաները: Նույնը երեկվա Ուզբեկստանի հետ դիմակայությունը։ Կարող եմ ասել՝ որքան հեշտ հաղթեցին ԱՄՆ-ին եւ Ադրբեջանին, այդքան հեշտ երեկ պարտվեցին Ուզբեկստանին:
Նշեցիք, որ Ադրբեջանի հետ միշտ հավելյալ լարվածություն է լինում:
Իսկապես կա լրացուցիչ լարվածություն, բայց նշեմ, որ նրանց մոտ այդ լարվածությունն ավելի ակնհայտ է, քան մեզ մոտ: Նույնը այս խաղում էր: Ուրախ եմ, որ մեր թիմը կարողացավ հաղթահարել այդ լարվածությունը եւ վստահ հաղթանակ տանել, ինչը շատ կարեւոր էր բոլորիս համար: Ոչ միայն շախմատի, այլեւ մեր երկրի համար շատ հաճելի պահ էր:
Վաղը վերջին տուրում մեր մրցակիցը Իսպանիայի հավաքականն է: Ի՞նչ սպասել այս դիմակայությունից:
Իսպանիայի հավաքականի առաջին երկու համարներ Շիրովն ու Վալիեխոն վերջին մի քանի տարիներին այդքան ակտիվ չեն մասնակցում մրցումների, չեմ կարծում, որ շատ վտանգավոր են: Ավելի շատ վտանգավոր են երրորդ եւ չորրորդ խաղատախտակները: Ամեն դեպքում՝ բավականին հարմար հավաքական է վերջին տուրում հաղթելու համար: Հաղթելու դեպքում երկրորդ տեղն ապահովում ենք: Վիճակահանության առումով մեր բախտը բերել է:
Վերջին որոշիչ տուրից առաջ ի՞նչ խոսքերով կաջակցեք մեր հավաքականին:
Կցանկանամ, որ մեկ վերջին անգամ կենտրոնացնեն բոլոր ուժերը: Հասկանալի է, որ բոլորն արդեն ֆիզիկապես հոգնել են: Օլիմպիադան երկար մրցաշար է, շատ էներգիա է տանում մարդուց, քանի որ լարվածությունը շատ մեծ է, հատկապես երբ պայքարում ես բարձր տեղերի համար: Հաջողություն եմ մաղթում: Ես վստահ եմ մեր տղաների վրա, որ կկարողանան պատվով դուրս գալ այս իրավիճակից եւ սպասում ենք հաղթանակած վերադարձի հայրենիք:
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում