09:07  ,  5 հունիսի, 2022

ԵԱ. Վերջին մրցումային օրը՝ Վարազդատ Լալայանի եւ Գոռ Մինասյանի մասնակցությամբ

Ալբանիայի մայրաքաղաք Տիրանայում ավարտին մոտեցող ծանրամարտի Եվրոպայի առաջնության վերջին օրը  Հայաստանը կունենա 2 մասնակից։ Հունիսի 5-ին մրցահարթակ դուրս կգան օլիմպիական փոխչեմպիոն Գոռ Մինասյանը եւ աշխարհի փոխչեմպիոն Վարազդատ Լալայանը  (+109 կգ):

25-ամյա Գոռ Մինասյանը Ռիոյի Օլիմպիական խաղերի փոխչեմպիոն է, 2018, 2019 թվականների աշխարհի փոխչեմպիոն, 2017, 2020, 2021 թվականների Եվրոպայի փոխչեմպիոն, Ունիվերսաիդա-2017-ի հաղթող, 2017 թվականի Եվրոպայի երիտասարդական առաջնության ոսկե մեդալակիր, 2016 Եվրոպայի փոխչեմպիոն, 2015 թվականի աշխարհի առաջնության բրոնզե մեդալակիր, 2013 թվականի աշխարհի երիտասարդական առաջնության փոխչեմպիոն, 2012 թվականի աշխարհի երիտասարդական առաջնության բրոնզե մեդալակիր, Եվրոպայի Մ-20 փոխչեմպիոն:

2019 թվականի Բաթումիի Եվրոպայի առաջնությունում ոտնաթաթի վնասվածքի պատճառով բավարարվեց փոքր բրոնզե մեդալով՝ պոկում վարժությունում բարձրացնելով 200 կգ: Նա երկամարտում 5-րդն էր՝ 422 կգ։ Նույն տարում Թաիլանդում անցկացված աշխարհի առաջնությունում Մինաայանը նվաճեց փոխչեմպիոնի տիտղոսը՝ երկամարտում հավաքելով 460 կգ։ ԱԱ-ից հետո Դոհայում տեղի ունեցած օլիմպիական վարկանիշային մրցաշարում աշխարհի փոխչեմպիոնը ոսկե մեդալ նվաճեց, ապա Բելառուսի Գրոդնո քաղաքում կրկնակի օլիմպիական չեմպիոն Ալեքսանդր Կուռլովիչի հիշատակին նվիրված Alexander Cup 2019 մրցաշարում արծաթե մեդալը նվաճեց երկամարտի 410 կգ (190+220) արդյունքով:

2021 թվականին ապրիլին Մոսկվայում անցկացված Եվրոպայի առաջնությունում +109 կգ քաշայինների պայքարում Գոռ Միանսյանը երկամարտի 264 կգ արդյունքով նվաճեց արծաթե մեդալ (216+248):

Տաշքենդում անցկացված 2021 թվականի աշխարհի առաջնությունում Գոռ Մինասյանը՝ 448 կգ (205+243) արդյունքով դարձավ բրոնզե մեդալակիր՝ երկամարտում 9 կիլոգրամ զիջելով փոխչեմպիոնի կոչումը նվաճած Վարազդատ Լալայանին:

Ալբանիայում ավարտվող Եվրոպայի առաջնությունում Գոռ Մինասյանի երկամարտի նախնական հայտը 450 կգ է։

Նույն՝ 450 կգ-ով է հայտավորվել նաեւ այս քաշային կարգում Հայաստանի մյուս ներկայացուցիչ, աշխարհի փոխչեմպիոն Վարազդատ Լալայանը։ 22-ամյա ծանրորդը 2016 թվականի ծանրամարտի Հայաստանի երիտասարդների չեմպիոն է, Եվրոպայի մինչեւ 17 տարեկանների արծաթե մեդալակիր։ 2016 Մալայզիայում անցկացված ծանրամարտի աշխարհի պատանեկան առաջնությունում երկամարտի 340 կգ (156+184) արդյունքով գրավել է 5-րդ տեղը: 2018 թվականին դարձել է ծանրամարտի Հայաստանի երիտասարդների չեմպիոն։

2018 թվականին Լեհաստանում նվաճել է Եվրոպայի երիտասարդական առաջնության փոխչեմպիոնի կոչումը: Մինչեւ 20 տարեկանների առաջնության գերծանր քաշային կարգում (+105 կգ) հայ ծանրորդը երկամարտում գրանցել է 406 կգ (184+222) արդյունք։ 2019 թվականին Ֆիջիում տեղի ունեցած աշխարհի երիտասարդական առաջնությում հռչակվել է չեմպիոն՝ երկամարտի 419 կգ-ով (192+227):

Լալայանը չեմպիոն է դարձել նաեւ 2019 թվականի Եվրոպայի մինչեւ 20 տարեկանների առաջնությունում +109 կգ քաշային կարգում։ Նա 3 կգ-ով գերազանցել  է մինչեւ 20 տարեկանների Եվրոպայի ռեկորդն այս քաշային կարգում՝ երկամարտում հասցնելով 424 կգ-ի։ Պոկում վարժությունում Վարազդատ Լալայանը բարձրացրել է 194 կգ, հրում վարժությունում՝ 230 կգ։ Երկու վարժություններում էլ նա բարելավել է այս տարիքային խմբի Եվրոպայի ռեկորդները։ 2021 թվականի Հայաստանի առաջնությունում Լալայանը 430 կգ-ով գրավել է երրորդ տեղը։

Մոսկվայում անցկացված Եվրոպայի առաջնությունում Լալայանը 445 կգ երկամարտի արդյունքով նվաճեց բրոնզե մեդալ (205+240):

Ավելի ուշ Ֆինլանդիայի Ռովանիեմի քաղաքում անցկացված ծանրամարտի Եվրոպայի մինչեւ 23 տարեկանների առաջնությունում Լալայանը հավասարը չունեցավ +109 կգ քաշայինների պայքարում: Մեծահասակների Եվրոպայի բրոնզե մեդալակիրը երկամարտի 447 կգ արդյունքով նվաճեց մինչեւ 23 տարեկանների չեմպիոնի կոչումը (206+241): 22-ամյա ծանրորդը սահմանեց մինչեւ 23 տարեկանների երեք ռեկորդ՝ պոկում, հրում վարժություններում եւ երկամարտում:

Տաշքենդում անցկացված աշխարհի առաջնությունում Վարազդատ Լալայանը գերազանցեց Գոռ Մինասյանին եւ երկամարտի 452 կգ արդյունքով նվաճեց աշխարհի փոխչեմպիոնի տիտղոսը՝ զիջելով միայն այս քաշային կարգում անգերազանցելի վրացի Լաշա Տալախաձեին:

+109 կգ քաշայինների A խմբի պայքարը կմեկնարկի Երեւանի ժամանակով 18:00-ին:

Հետևեք NEWS.am SPORT-ին Facebook-ում, Twitter և Telegram-ում